മോദി മുൻ സർക്കാരുകളുടെ പ്രവർത്തനം മാത്രം തുടരുന്നു; വിമർശിച്ച് ചിദംബരം
Mail This Article
ന്യൂഡൽഹി∙ രാജ്യത്തെ എല്ലാ ഗ്രാമങ്ങളിലും വൈദ്യുതിയുണ്ടെന്ന പ്രധാനമന്ത്രി നരേന്ദ്ര മോദിയുടെ പരാമർശത്തെ വിമർശിച്ച് മുതിർന്ന കോൺഗ്രസ് നേതാവ് പി.ചിദംബരം. എല്ലാ ഗ്രാമങ്ങളിലും വൈദ്യുതി എത്തിയെന്ന് പ്രധാനമന്ത്രി അവകാശപ്പെട്ട ദിവസം, എൻഡിഎയുടെ രാഷ്ട്രപതി സ്ഥാനാർഥി ദ്രൗപദി മുർമുവിന്റെ ഗ്രാമത്തിൽ വൈദ്യുതി എത്തിക്കാൻ യുദ്ധകാലാടിസ്ഥാനത്തിൽ നടപടികൾ സ്വീകരിച്ചതായി വാർത്തകൾ വന്നിരുന്നുവെന്ന് അദ്ദേഹം ട്വീറ്റ് ചെയ്തു.
‘ഇത് വൈദ്യുതി ഇല്ലാത്ത ഒരേയൊരു കുഗ്രാമമോ ഗ്രാമമോ അല്ല. ഇന്ത്യയിലെ നിരവധി വിദൂര പ്രദേശങ്ങളിലും ഗ്രാമങ്ങളിലും ഇതുവരെ വൈദ്യുതി എത്തിയിട്ടില്ലെന്ന് സമ്മതിക്കുന്നതിൽ ലജ്ജയില്ല. ഇന്ത്യയിലെ ആയിരക്കണക്കിന് വീടുകളിൽ വൈദ്യുതി ഇല്ലെന്ന് സമ്മതിക്കുന്നതിലും ലജ്ജിക്കുന്നില്ല. കഴിഞ്ഞ 75 വർഷമായി ഇന്ത്യ നേടിയത് തീർച്ചയായും ശ്രദ്ധേയമാണ്. എന്നാൽ ഇന്ത്യയുടെ എല്ലാ ഭാഗങ്ങളിലേക്കും അവശ്യ സേവനങ്ങൾ എത്തിക്കുന്നത് എല്ലായ്പ്പോഴും ‘പുരോഗമിച്ചുകൊണ്ടിരിക്കുകയാണ്’. മുൻ സർക്കാരുകളുടെ പ്രവർത്തനം മാത്രമാണ് മോദി സർക്കാർ തുടരുന്നത്’– അദ്ദേഹം പറഞ്ഞു.
ജി7 ഉച്ചകോടിക്കായി ജർമനിയിലെത്തിയ പ്രധാനമന്ത്രി, മ്യൂണിക്കിൽ നടന്ന പരിപാടിയിൽ ഇന്ത്യൻ സമൂഹത്തെ അഭിസംബോധന ചെയ്യവെയാണ് വൈദ്യുതിയെക്കുറിച്ച് പരാമർശിച്ചത്. ‘ഇന്ത്യയിലെ എല്ലാ ഗ്രാമങ്ങളും തുറസ്സായ മലമൂത്ര വിസർജന രഹിതമാണ്, എല്ലാ ഗ്രാമങ്ങളിലും വൈദ്യുതിയുണ്ട്, 99 ശതമാനം ഗ്രാമങ്ങളിലും പാചക ഇന്ധനമുണ്ട്. കഴിഞ്ഞ 2 വർഷമായി പാവപ്പെട്ട 80 കോടി പേർക്ക് സൗജന്യ റേഷൻ നൽകുന്നു’– പ്രധാനമന്ത്രി പറഞ്ഞു.
English Summary: "PM Modi Continuing Work Of Previous Governments": P Chidambaram