ന്യൂഡൽഹി ∙ കേന്ദ്ര വിദേശകാര്യ സഹമന്ത്രി വി.മുരളീധരൻ വനം പരിസ്ഥിതി മന്ത്രി ഭൂപേന്ദർ യാദവുമായി കൂടിക്കാഴ്ച നടത്തി. സംരക്ഷിത വനമേഖലയുടെ ഒരു കിലോമീറ്റർ ചുറ്റളവ് പരിസ്ഥിതിലോല മേഖലയായി പ്രഖ്യാപിക്കണമെന്ന സുപ്രീംകോടതി ഉത്തരവിലെ ആശങ്ക അകറ്റണം എന്നാവശ്യപ്പെട്ടാണ് കൂടിക്കാഴ്‌ച. ഉത്തരവിന്റെ പശ്ചാത്തലത്തിൽ സംസ്ഥാനത്തെ ജനജീവിതം തടസപ്പെടുത്തുന്ന തീരുമാനങ്ങൾ ഉണ്ടാവരുതെന്ന് മന്ത്രി ആവശ്യപ്പെട്ടു.

ദേശീയ ശരാശരിയെക്കാൾ ജനസാന്ദ്രതയുള്ള കേരളത്തിന്റെ ആശങ്ക ഗൗരവകരമാണ്. കൃഷി, ചെറുകിട വ്യവസായം തുടങ്ങി സർവമേഖലയേയും പ്രതികൂലമായി ബാധിക്കുമെന്ന ആശങ്കയിൽ കഴിയുകയാണ് വനാതിർത്തി പ്രദേശങ്ങളിലെ ജനങ്ങളെന്നും മന്ത്രി ചൂണ്ടിക്കാട്ടി. സംസ്ഥാനത്തുടനീളം ബഫർസോൺ വിധിയിൽ പ്രതിഷേധം ശക്തമാക്കുന്നതിനിടെയാണ് കൂടിക്കാഴ്ച. കേന്ദ്ര ഇടപെടൽ ആവശ്യപ്പെട്ട് കേരളത്തിൽ നിന്നുള്ള സംഘവും വി.മുരളീധരനെ കണ്ടിരുന്നു. 

English Summary: V Muraleedharan meets Bhupendar Yadav over Buffer zone verdict by Supreme Court