സിപിഎമ്മും അതിന്റെ മുഖ്യമന്ത്രിയും ആക്രമണങ്ങൾക്ക് വിധേയനാകുന്ന ഈ വേളയിൽ പ്രതിരോധത്തിനു മുന്നിൽ നിൽക്കുന്ന സഖാക്കളിൽ പ്രധാനിയാണ് മുതിർന്ന നേതാവും സിപിഎം കേന്ദ്രകമ്മിറ്റി അംഗവുമായ എ.കെ.ബാലൻ. വിഎസ് സർക്കാരിലും ഒന്നാം പിണറായി സർക്കാരിലും മന്ത്രി ആയിരുന്ന ചുരുക്കം നേതാക്കളിൽ ഒരാൾ കൂടിയാണ് ബാലൻ. പാർലമെന്ററി രംഗത്ത് സിപിഎമ്മിന്റെ മുഖങ്ങളിൽ ഒരാളായിരുന്ന മുൻ ലോക്സഭാംഗം കൂടിയായ ബാലൻ ഇന്ന് സംഘടനാ രംഗത്താണു ശ്രദ്ധ കേന്ദ്രീകരിച്ചിരിക്കുന്നത്. പാർട്ടി ആസ്ഥാനമായ എകെജി സെന്ററിലെ നേതൃനിരയുടെ ഭാഗമായി പ്രവർത്തിക്കുന്ന അദ്ദേഹം സഹപ്രവർത്തകർക്കും പുതിയ തലമുറയിൽ പെട്ടവർക്കും ഏതു സമയത്തും ആശ്രയിക്കാവുന്ന ഉറ്റസഖാവായാണ് അറിയപ്പെടുന്നത്.
