സമീപവാസിയുടെ വൈദ്യുതി വേലിയിൽ കുരുങ്ങി വീട്ടമ്മ മരിച്ചു; തനിക്കും ഷോക്കേറ്റെന്ന് ഭർത്താവ്

കുമ്പളാംപൊയ്ക (പത്തനംതിട്ട) ∙ വൈദ്യുതാഘാതമേറ്റ് വീട്ടമ്മ മരിച്ചു. വള്ളിയാനി ചരിവുപുരയിടത്തിൽ ശാന്തമ്മ ഏബ്രഹാം (63) ആണ് മരിച്ചത്. ഇന്നലെ വൈകിട്ട് 5.30ന് വിറക് ശേഖരിക്കാൻ പോയ ശാന്തമ്മ 6.30 ആയിട്ടും തിരിച്ചെത്താത്തതിനെ തുടർന്ന് ഭർത്താവ് ഏബ്രഹാം തോമസ് അന്വേഷിച്ച് പോയപ്പോഴാണ് സമീപവാസിയുടെ പുരയിടത്തിൽ വൈദ്യുതിവേലിയിൽ കുരുങ്ങിക്കിടക്കുന്ന നിലയിൽ കണ്ടത്.

ഭാര്യയെ രക്ഷിക്കാനുള്ള ശ്രമത്തിനിടയിൽ തനിക്കും ഷോക്കേറ്റെന്ന് ഏബ്രഹാം തോമസ് പറഞ്ഞു. മൃതദേഹം പത്തനംതിട്ട ജനറൽ ആശുപത്രി മോർച്ചറിയിലേക്ക് മാറ്റി. മലയാലപ്പുഴ സിഐ കെ.എസ്.വിജയന്റെ നേതൃത്വത്തിൽ പൊലീസ് സ്ഥലത്തെത്തി മേൽനടപടികൾ സ്വീകരിച്ചു. സംസ്കാരം പിന്നീട്. മക്കൾ: സന്തോഷ് തോമസ്, മിനി തോമസ്. മരുമകൻ: റെന്നി ഏബ്രഹാം.

English Summary: Women Electrocuted in Pathanamthitta