അതൊരു വലിയ ചുവടുവയ്പായിരുന്നു. മറ്റെല്ലാവരേക്കാൾ മുൻപേ നടക്കാനുള്ള വിപ്ലവകരമായ ഒരു ശ്രമം. ഇതാണ് ശരിയായ ചുവടെന്ന് പലരും ആവർത്തിച്ചു പറയുകയും പ്രകീർത്തിക്കുകയും ചെയ്തു. എന്നാൽ, പെട്ടെന്നാണ് എല്ലാം തകിടം മറിഞ്ഞത്. ഉള്ളതെല്ലാം വിറ്റു ബിറ്റ്കോയിൻ വാങ്ങിയ എൽ സാൽവദോർ എന്ന രാജ്യം ബിറ്റ്കോയിൻ ഉൾപ്പെടെയുള്ള ക്രിപ്റ്റോകറൻസികൾ തകർന്നടിയുന്നത് കണ്ട് തരിച്ചുനിൽക്കുമ്പോൾ രാജ്യാന്തര നാണയനിധി (ഐഎംഎഫ്) ഉൾപ്പെടെയുള്ളവർ മൂക്കത്തു വിരൽ വച്ചു ചോദിക്കുന്നത് ഒരേ ചോദ്യമാണ്- ഇതിന്റെയൊക്കെ വല്ല കാര്യവുമുണ്ടായിരുന്നോ? ക്രിപ്റ്റോകറൻസി സമ്പദ്‌വ്യവസ്ഥയുടെ ഭാവിയാണെന്നും ബിറ്റ്കോയിൻ ഭാവിയുടെ ലോക കറൻസിയാണെന്നുമൊക്കെ സാമ്പത്തിക-സാങ്കേതിക വിദഗ്ധർ കഴിഞ്ഞ പത്തു വർഷമായി പ്രഘോഷിച്ചപ്പോഴൊന്നും തകർന്നുവീഴാത്ത ബിറ്റ്കോയിനും മറ്റു ക്രിപ്റ്റോകറൻസികളും എൽ സാൽവദോർ കാശിറക്കിയപ്പോൾ തകർന്നടിയാൻ കാരണമെന്താണ്?
