തരൂരിന് ഷെവലിയർ ബഹുമതി; ഫ്രഞ്ച് മന്ത്രിമാർ ഇന്ത്യയിലെത്തുമ്പോൾ പുരസ്കാരം കൈമാറും

ന്യൂഡൽഹി∙ എഴുത്തുകാരനും ഐക്യരാഷ്ട്ര സഭ മുൻ അണ്ടർ സെക്രട്ടറി ജനറലും തിരുവനന്തപുരം എംപിയുമായ ശശി തരൂരിന് ഷെവലിയർ ബഹുമതി. ഫ്രഞ്ച് സർക്കാരിന്റെ പരമോന്നത സിവിലിയൻ ബഹുമതിയാണ് ഷെവലിയർ. തരൂരിന്റെ രചനകളും പ്രസംഗംങ്ങളും കണക്കിലെടുത്താണ് പുരസ്കാരം. ഫ്രഞ്ച് മന്ത്രിമാരുടെ ഇന്ത്യാ സന്ദർശന വേളയിൽ പുരസ്കാരം കൈമാറും.

ഇതുസംബന്ധിച്ച് ഇന്ത്യയിലെ ഫ്രഞ്ച് അംബാസഡർ തരൂരിന് കത്തെഴുതി. കഴിഞ്ഞവർഷം ഫ്രഞ്ച് ഭാഷയിൽ തരൂർ നടത്തിയ പ്രസംഗം എംബസി ഉദ്യോഗസ്ഥരെയും മറ്റും അദ്ഭുതപ്പെടുത്തിയിരുന്നു. 2010ൽ സ്പെയ്നിലെ സമാന പുരസ്കാരത്തിന് അദ്ദേഹം അർഹനായിരുന്നു.

ഫ്രാൻസുമായുള്ള ബന്ധം വിലമതിക്കുന്ന, ആ ഭാഷയെ ഇഷ്ടപ്പെടുന്ന, ആ സംസ്കാരത്തെ ബഹുമാനിക്കുന്ന ആളെന്ന നിലയിൽ ഈ ബഹുമതിയെ ആദരപൂർവം കാണുന്നുവെന്ന് ശശി തരൂർ ട്വീറ്റ് ചെയ്തു. ഈ പുരസ്കാരത്തിന് തന്നെ തിരഞ്ഞെടുക്കാൻ തീരുമാനിച്ചവരോടുള്ള നന്ദി അറിയിക്കുന്നുവെന്നും അദ്ദേഹം കുറിച്ചു.

English Summary: Shashi Tharoor to receive Legion Of Honour ‘Chevalier de la Legion d’Honneur’, France’s highest civilian award