മത്സ്യത്തൊഴിലാളികളെ സർക്കാർ ചർച്ചയ്ക്ക് വിളിച്ചു; തീയതി പിന്നീട് തീരുമാനിക്കും
Mail This Article
തിരുവനന്തപുരം∙ വിഴിഞ്ഞത്ത് സമരം ചെയ്യുന്ന മത്സ്യത്തൊഴിലാളികളെ ചർച്ചയ്ക്ക് വിളിച്ച് സർക്കാർ. സർക്കാരിന്റെ ക്ഷണം സ്വീകരിക്കുന്നെന്ന് തിരുവനന്തപുരം ലത്തീൻ അതിരൂപത അറിയിച്ചു. ഫിഷറീസ് മന്ത്രി വി.അബ്ദുറഹിമാനാണ് അതിരൂപത അധികൃതരെ ചർച്ചയ്ക്ക് ക്ഷണിച്ചത്. ചർച്ചയുടെ തീയതി പിന്നീട് തീരുമാനിക്കും.
കേരളത്തിലെ മത്സ്യത്തൊഴിലാളികളുടെയും തീരദേശത്തെയും പ്രശ്നങ്ങൾ ചർച്ച ചെയ്യാൻ കേന്ദ്ര, സംസ്ഥാനതല ഉദ്യോഗസ്ഥരുടെ യോഗത്തിൽ പങ്കെടുക്കാനായി മന്ത്രി വി.അബ്ദുറഹിമാന് ഡൽഹിയിലാണ്. അദ്ദേഹം എത്തിയശേഷമാകും തീയതി തീരുമാനിക്കുക.
വിഴിഞ്ഞം തുറമുഖ നിർമാണം തീരശോഷണമുണ്ടാക്കുമെന്നു ചൂണ്ടിക്കാട്ടിയും വീടുകൾ നഷ്ടമായവരെ പുനരധിവസിപ്പിക്കണമെന്ന് ആവശ്യപ്പെട്ടുമാണു ലത്തീൻ അതിരൂപതയുടെ നേതൃത്വത്തിൽ തീരദേശവാസികൾ സമരം നടത്തുന്നത്.
English Summary: Government Calls Talks with fishermen