എലിസബത്ത് രാജ്ഞിയുടെ സംസ്കാരം: ചടങ്ങിൽനിന്ന് ചൈനയെ വിലക്കിയെന്ന് റിപ്പോർട്ട്
Mail This Article
ലണ്ടൻ∙ എലിസബത്ത് രാജ്ഞിയുടെ സംസ്കാരത്തിനായി ലണ്ടനിലെത്തുന്ന ചൈനീസ് സംഘത്തിന് പാർലമെന്റിനുള്ളിൽ അന്തിമോപചാരം അർപ്പിക്കാൻ ബ്രിട്ടിഷ് സർക്കാർ അനുമതി നിഷേധിച്ചതായി റിപ്പോർട്ട്. ബ്രിട്ടിഷ് മാധ്യമമായ ബിബിസിയാണ് ഇക്കാര്യം റിപ്പോർട്ട് ചെയ്തിരിക്കുന്നത്. സിൻജിയാങ് പ്രവിശ്യയിൽ ഉയിഗുർ മുസ്ലിംകൾക്കെതിരായി നടക്കുന്ന അതിക്രമത്തിനെതിരെ വിമർശനം ഉന്നയിച്ച ബ്രിട്ടിഷ് പാർലമെന്റ് അംഗങ്ങള്ക്കെതിരെ ചൈന ഉപരോധം ഏർപ്പെടുത്തിയിരുന്നു.
ഇതേത്തുടർന്ന് ചൈനീസ് പ്രതിനിധി സംഘം പാർലമെന്റ് സമുച്ചയത്തിലുള്ള വെസ്റ്റ്മിനിസ്റ്റർ ഹാളിൽ രാജ്ഞിക്ക് അന്തിമോപചാരം അർപ്പിക്കുന്നതിനെതിരെ ചില പാർലമെന്റംഗങ്ങൾ ആശങ്ക ഉയർത്തി. ഇതേത്തുടർന്നാണ് തീരുമാനമെന്നാണ് വിവരം. അതേസമയം, ഇക്കാര്യത്തിൽ ബ്രിട്ടൻ ഔദ്യോഗിക അറിയിപ്പ് നൽകിയിട്ടില്ല.
വിദേശകാര്യ ഓഫിസുമായി സംസാരിച്ചശേഷം ബക്കിങ്ങാം കൊട്ടാരമാണ് അതിഥികളുടെ പട്ടിക അന്തിമമാക്കുന്നതെന്ന് പ്രധാനമന്ത്രി ലിസ് ട്രസ്സിന്റെ വക്താവ് അറിയിച്ചു. സുരക്ഷാ കാര്യങ്ങളായതിനാൽ പ്രതികരിക്കുന്നില്ലെന്ന് ഹൗസ് ഓഫ് കോമൺസും വ്യക്തമാക്കി. അതേസമയം, ഇക്കാര്യത്തെക്കുറിച്ച് അറിയില്ലെന്ന് ചൈന വ്യക്തമാക്കി.
English Summary: China banned from viewing Queen Elizabeth lying-in-state - BBC