പദവിക്ക് യോജിച്ച് പ്രവർത്തിക്കാൻ ഗവർണർക്ക് നിർദേശം നൽകണം; രാഷ്ട്രപതിയോട് ബിനോയ് വിശ്വം
Mail This Article
തിരുവനന്തപുരം∙ പദവിക്ക് യോജിച്ച രീതിയിൽ പ്രവർത്തിക്കാൻ ഗവർണർ ആരിഫ് മുഹമ്മദ് ഖാന് നിർദേശം നൽകണമെന്ന് ആവശ്യപ്പെട്ട് സിപിഐ എംപി ബിനോയ് വിശ്വം രാഷ്ട്രപതിക്കു കത്തയച്ചു. ഭരണഘടനാപരമായി പ്രവർത്തിക്കുന്ന സംസ്ഥാന സര്ക്കാരിന്റെ പ്രവർത്തനങ്ങളില് ഇടപെടാതിരിക്കാൻ നിർദേശിക്കണമെന്നും കത്തിൽ ആവശ്യപ്പെട്ടു. നിയമസഭ പാസാക്കിയ ബില്ലുകൾ പാസാക്കില്ലെന്നാണ് ഗവർണർ പ്രഖ്യാപിച്ചിരിക്കുന്നത്. ഗവർണറുടെ നടപടി ഭരണഘടനാ വിരുദ്ധമാണ്. ഭരണഘടനയും നിയമവും പരിരക്ഷിക്കാൻ ഗവർണർ പ്രതിജ്ഞാബദ്ധമാണ്.
പഴഞ്ചൊല്ലിൽ പറയുന്നതുപോലെ തുരുമ്പെടുത്ത സ്വർണമായി ഗവർണർ മാറി. ഭരണഘടനയുടെ ഏറ്റവും പ്രധാനപ്പെട്ട ഘടകം എന്നു പറയുന്നത് കാബിനറ്റ് സംവിധാനം ഉൾപ്പെടുന്ന പാർലമെന്ററി ജനാധിപത്യമാണ്. കേന്ദ്ര സർക്കാരും സംസ്ഥാന സർക്കാരും തമ്മിലുള്ള ഇടനിലക്കാരനാണ് ഗവർണർ. സ്വന്തം രാഷ്ട്രീയം പ്രകടിപ്പിക്കാൻ ഗവർണർ പദവി ഉപയോഗിക്കാൻ പാടില്ലെന്ന് ജസ്റ്റിസ് വി.ആർ.കൃഷ്ണയ്യർ ചൂണ്ടിക്കാട്ടിയ കാര്യവും കത്തിൽ പറയുന്നു.
English Summary: Binoy Viswam writes to Indian President against Governor Arif Mohammed Khan