ഉറപ്പ് രേഖാമൂലം നൽകണമെന്ന് സമരസമിതി; വിഴിഞ്ഞത്ത് സമവായ നീക്കം സജീവം

തിരുവനന്തപുരം∙ വിഴിഞ്ഞം തുറമുഖ നിർമാണവുമായി ബന്ധപ്പെട്ട മത്സ്യത്തൊഴിലാളികളുടെ സമരത്തിൽ സമവായ നീക്കങ്ങൾ സജീവമാകുന്നതിനിടെ ഉറപ്പുകൾ രേഖാമൂലം നൽകണമെന്നാവശ്യപ്പെട്ട് സമരസമിതി. മന്ത്രിതല ഉപസമിതി വച്ച നിർദേശങ്ങളിലെ തീരുമാനം സമരസമിതി നാളെ സർക്കാരിനെ അറിയിക്കും.

പുനരധിവാസമുൾപ്പെടെ സമഗ്ര പാക്കേജ് നടപ്പാക്കുന്നത് സംബന്ധിച്ച ചർച്ചകൾ പുരോഗമിക്കുകയാണ്. തീരശോഷണം പഠിക്കാൻ സമിതിയെ നിയോഗിക്കാനും ധാരണയായി. ഏഴിൽ ആറ് ആവശ്യങ്ങളിലും രേഖാമൂലം ഉറപ്പു ലഭിക്കുന്നതോടെ തുറമുഖ നിർമാണം നിർത്തണമെന്ന ആവശ്യത്തിൽ നിന്ന് സമരസമിതി പിന്മാറിയേക്കും.

കഴിഞ്ഞ ആഴ്ചകളിൽ തുറമുഖ സമരത്തിന് ആഹ്വാനം ചെയ്ത് പള്ളികളിൽ വായിച്ചിരുന്ന സർക്കുലർ ഇന്നില്ലാത്തതും സമരത്തിന് നേതൃത്വം നൽകുന്ന ലത്തീൻ അതിരൂപത മയപ്പെടുന്നതിന്റെ സൂചനയാണ്. ചൊവ്വാഴ്ച വീണ്ടും മന്ത്രിതല സമിതിയുമായി ചർച്ച നടക്കും.

English Summary: Vizhinjam Port Protest updates