‘യു ടേണി’നായി കാത്തുനിന്ന വാഹനങ്ങൾക്കിടയിലേക്ക് കെഎസ്ആർടിസി ബസ് ഇടിച്ചുകയറി

കൊച്ചി ∙ ദേശീയപാതയിൽ ആലുവ കമ്പനിപ്പടിയിൽ ‘യു ടേൺ’ കാത്തുനിന്ന വാഹനങ്ങൾക്കിടയിലേക്ക് കെഎസ്ആർടിസി ബസ് ഇടിച്ചുകയറി യാത്രക്കാർക്ക് പരിക്ക്. ‘യു ടേൺ’ തിരിയാൻ നിന്ന ചരക്ക് ലോറിക്കു പിന്നിൽ നിർത്തിയിരുന്ന വാൻ അപകടത്തിൽ തകർന്നു. രാവിലെ 9 മണിയോടെയായിരുന്നു സംഭവം. കാർയാത്രക്കാരനായ ബാബു എന്നയാൾക്കാണ് പരുക്കേറ്റത്. ബസ് യാത്രക്കാരിൽ ചിലർക്കും പരുക്കുണ്ട്. നാട്ടുകാരും അഗ്നിരക്ഷാ സേനയും ചേർന്ന് പരുക്കേറ്റവരെ ആശുപത്രിയിലാക്കി

ദേശീയപാതയിൽ ആലുവ–കളമശേരി ഭാഗത്ത് അപകടം പതിവായിരിക്കുകയാണ്. ഒരു മാസത്തിനുള്ളിൽ രണ്ടു പേരാണ് ഈ ഭാഗങ്ങളിലുണ്ടായ അപകടങ്ങളിൽ മരിച്ചത്. നിരവധി പേർക്ക് പരുക്കേറ്റിട്ടുമുണ്ട്. ഇന്നലെ പുലർച്ചെ അഞ്ചു മണിക്ക് അമ്പാട്ടുകാവിലുണ്ടായ അപകടത്തിൽ ഗുരുതരമായി പരുക്കേറ്റ ഒരാൾ ഇപ്പോഴും ആശുപത്രിയിലാണ്. നിർത്തിയിട്ടിരുന്ന ലോറിക്കു പിന്നിൽ ടിപ്പറിടിച്ചായിരുന്നു അപകടം. 

English Summary: Accident at Aluva