ഭാരത് ജോഡോ കർണാടകയിൽ; മാണ്ഡ്യയിൽ രാഹ‍ുലിനൊപ്പം ചേർന്ന് സോണിയ ഗാന്ധി

മാണ്ഡ്യ∙ മകൻ രാഹുൽ ഗാന്ധി നയിക്കുന്ന ഭാരത് ജോഡോ യാത്രയിൽ കോൺഗ്രസ് അധ്യക്ഷ സോണിയ ഗാന്ധി പങ്കെടുത്തു. കർണാടകയിലെ മാണ്ഡ്യയിൽ വച്ചാണ് യാത്രയോടൊപ്പം സോണിയയും ചേർന്നത്. ആരോഗ്യപ്രശ്നങ്ങളെ തുടർന്ന് വളരെ നാളുകൾക്കുശേഷമാണ് സോണിയ ഒരു പൊതുചടങ്ങിൽ പങ്കെടുക്കുന്നത്. പാർട്ടി പ്രവർത്തകരുടെ വൻ സംഘത്തോടൊപ്പം കുറച്ചുദൂരം അവർ പദയാത്രയിൽ അനുഗമിക്കുകയും ചെയ്തു. അതിനുശേഷമാണ് കാറിൽ യാത്ര തുടർന്നത്.

തിങ്കളാഴ്ച വൈകുന്നേരമാണ് സോണിയ മൈസുരുവിൽ എത്തിയത്. ആയുധ പൂജ, വിജയദശമി അവധി ദിനങ്ങളായതിനാൽ ചൊവ്വാഴ്ചയും ബുധനാഴ്ചയും യാത്രയ്ക്ക് വിശ്രമം ആയിരുന്നു. സോണിയ പങ്കെടുത്തതിൽ അഭിമാനം തോന്നുന്നുവെന്ന് കോൺഗ്രസ് സംസ്ഥാന അധ്യക്ഷന്‍ ഡി.കെ. ശിവകുമാർ പറഞ്ഞു.

കന്യാകുമാരിയിൽനിന്ന് ആരംഭിച്ച യാത്ര 3750 കിലോമീറ്റർ സഞ്ചരിച്ച് 12 സംസ്ഥാനങ്ങളിലൂടെ കശ്മീരിലെത്തിയാണ് അവസാനിക്കുക.

English Summary: Sonia Gandhi Joins Rahul Gandhi-Led Congress March In BJP-Ruled Karnataka