കോഴിക്കോട് - കണ്ണൂർ റൂട്ടിൽ ട്രെയിൻ സർവീസ് മുടങ്ങി; യാത്രാ ദുരിതം

കോഴിക്കോട്∙ കണ്ണൂർ – കോഴിക്കോട് റൂട്ടിൽ ട്രെയിൻ സർവീസ് മുടങ്ങിയതോടെ യാത്രാ ദുരിതം. തലശേരിക്കും എടക്കാടിനുമിടയിലുള്ള റെയിൽവെ പാലത്തിന്റെ കമ്മിഷനിങ് നടക്കുന്നതിനാലാണ് സർവീസുകൾ മുടങ്ങിയത്. പ്രശ്നം പരിഹരിക്കാൻ കെഎസ്ആർടിസിയും അധിക സർവീസ് നടത്തുന്നില്ല. വൈകിട്ടോടെ ഇതുവഴിയുള്ള ട്രെയിൻ ഗതാഗതം പുനസ്ഥാപിക്കുമെന്നാണു റെയിൽവെ അറിയിക്കുന്നത്.

എറണാകുളം - കണ്ണൂർ എക്സ്പ്രസ്, ചെന്നൈ - എഗ്മോർ മംഗളൂരു എക്സ്പ്രസ്, കോഴിക്കോട് മംഗളൂരു എക്സ്പ്രസ് എന്നിവ ഇന്ന് കോഴിക്കോട് സർവീസ് അവസാനിപ്പിക്കും. നാഗർകോവിൽ – മംഗളൂരു – ഏറനാട് എക്സ്പ്രസ് വടകരയിൽ സർവീസ് അവസാനിപ്പിക്കും. തൃശൂർ - കണ്ണൂർ എക്സ്പ്രസ്, കണ്ണൂർ - ഷൊർണൂർ, കോഴിക്കോട് - കണ്ണൂർ സ്പെഷൽ എക്സ്പ്രസ് വടകരയിൽ സർവീസ് അവസാനിപ്പിച്ചു.

തൃശൂർ - കണ്ണൂർ എക്സ്പ്രസ്, കണ്ണൂർ - ഷൊർണൂർ, കോഴിക്കാട് - കണ്ണൂർ സ്പെഷൽ എക്സ്പ്രസ് എന്നിവ പൂർണമായും റദ്ദാക്കി. വൈകിട്ടുള്ള കൊച്ചുവേളി പോർബന്തർ എക്സപ്രസ്, തിരുവനന്തപുരം - മംഗളൂരു എക്സ്പ്രസ്, നേത്രാവതി എക്സ്പ്രസ് എന്നിവ വൈകിയോടാനും സാധ്യതയുണ്ട്.

English Summary: Thalassery- Edakkad bridge construction; Train delays in Kozhikode