ഡെങ്കിപ്പനിക്കെതിരെ ജാഗ്രതവേണം, ജില്ലകളിൽ പ്രതിരോധപ്രവർത്തനം ശക്തമാക്കണം: മന്ത്രി വീണ
Mail This Article
തിരുവനന്തപുരം∙ സംസ്ഥാനത്തെ ഇടവിട്ടുള്ള മഴയെ തുടർന്ന് ഡെങ്കിപ്പനിയ്ക്കെതിരെ ജാഗ്രത പാലിക്കണമെന്ന് ആരോഗ്യമന്ത്രി വീണാ ജോർജ്. 'എല്ലാവരും ഡെങ്കിപ്പനി പടരാതിരിക്കാനുള്ള മുൻകരുതലുകളെടുക്കണം. എല്ലാ ജില്ലകളും പ്രതിരോധ പ്രവർത്തനങ്ങൾ ശക്തമാക്കണം. കൊതുക് നശീകരണ പ്രവര്ത്തനങ്ങള്ക്കും ഉറവിട നശീകരണത്തിനും പ്രധാന്യം നല്കണം. പനി ബാധിച്ചാല് സ്വയം ചികിത്സ പാടില്ല. നീണ്ടുനില്ക്കുന്ന പനി ശ്രദ്ധിക്കണം. പനി ബാധിച്ച് സങ്കീര്ണമാകുമ്പോഴാണ് പലരും ആശുപത്രിയിലെത്തുന്നത്. ഇത് രോഗം ഗുരുതരമാക്കും. അതിനാല് പനി ബാധിച്ചാല് മറ്റു പകര്ച്ചപ്പനികളല്ലെന്ന് ഉറപ്പാക്കണം'-മന്ത്രി പറഞ്ഞു.
മഴക്കാല പൂര്വ ശുചീകരണ പ്രവര്ത്തനങ്ങള് ഊര്ജിതമാക്കാന് മുഖ്യമന്ത്രിയുടെ നേതൃത്വത്തില് യോഗം ചേര്ന്നിരുന്നു. ഇതിനു പുറമേ തദ്ദേശ സ്വയംഭരണ വകുപ്പിന്റെ നേതൃത്വത്തിലുള്ള പ്രവര്ത്തനങ്ങളും ആരോഗ്യ ജാഗ്രതാ കലണ്ടര് പ്രകാരമുള്ള ആരോഗ്യ വകുപ്പിന്റെ പ്രവര്ത്തനങ്ങളും നടക്കുന്നുണ്ട്. അവബോധ പ്രവര്ത്തനങ്ങള് ശക്തമാക്കാനും ആരോഗ്യ വകുപ്പ് ഡയറക്ടര്ക്ക് മന്ത്രി നിര്ദേശം നല്കി. .
വീടുകളിൽ ശ്രദ്ധിക്കണം ഇവയെല്ലാം
∙വീടിന്റെ പുറത്തും അകത്തും ചെറുതും വലുതുമായ ഇടങ്ങളില് വെള്ളം കെട്ടി നില്ക്കാതെ നോക്കണം.
∙വീടിന്റെ ചുറ്റുപാട്, ടെറസ് എന്നിവിടങ്ങളിലും വെള്ളം കെട്ടിനില്ക്കാതെ നോക്കണം.
∙അലക്ഷ്യമായി വലിച്ചെറിയുന്ന പ്ലാസ്റ്റിക്ക്, ചിരട്ട തുടങ്ങിയവയിൽ വെള്ളം കെട്ടി നിന്ന് കൊതുക് വളരാം. വീടിനകത്തെ ചെടികള് വയ്ക്കുന്ന ട്രേ കൊതുകിന്റെ ഉറവിടമാകാറുണ്ട്. ഇതിനാല് ചെടിച്ചട്ടികളുടെയും ഫ്രിജിലെയും ട്രേയിലെ വെള്ളം ആഴ്ച തോറും മാറ്റണം.
∙അടഞ്ഞുകിടക്കുന്ന വീടുകള്, സ്ഥാപനങ്ങള്, ഉപയോഗശൂന്യമായ ടയറുകള്, ബ്ലോക്കായ ഓടകള്, വീടിനകത്തെ ചെടികള്, വെള്ളത്തിന്റെ ടാങ്കുകള്, ഹാര്ഡ് വെയര് കടകളിലേയും, അടഞ്ഞ് കിടക്കുന്ന വീടുകളിലേയും ക്ലോസറ്റുകള്, പഴയ വാഹനങ്ങള് എന്നിവയും ശ്രദ്ധിക്കണം.
∙ സ്ഥാപനങ്ങള്, ആശുപത്രികള്, ഹോസ്റ്റലുകള് എന്നിവ കൃത്യമായി ശുചീകരിക്കണം. അതിഥി തൊഴിലാളികളുടെ താമസ സ്ഥലങ്ങളും പ്രത്യേകം ശ്രദ്ധിക്കണം.
English Summary: People Should aware about Dengue fever