‘പിണറായിയുടെ അഴിമതിയെ പ്രതിരോധിക്കാൻ മന്ത്രിമാരോട് മരുമകൻ; സിപിഎമ്മും കുടുംബ പാർട്ടി’

തിരുവനന്തപുരം∙ മുഖ്യമന്ത്രി പിണറായി വിജയന്റെ അഴിമതി പ്രതിരോധിക്കാൻ സിപിഎം മന്ത്രിമാർ രംഗത്തിറങ്ങണമെന്ന മരുമകൻ മുഹമ്മദ് റിയാസിന്റെ പ്രസ്താവന, സിപിഎമ്മും കുടുംബ പാർട്ടിയായി മാറിയെന്നതിന്റെ ഉദാഹരണമാണെന്ന് ബിജെപി സംസ്ഥാന അധ്യക്ഷൻ കെ.സുരേന്ദ്രൻ. മുഖ്യമന്ത്രിയുടെ കുടുംബത്തിനെതിരെയാണ് ആരോപണങ്ങൾ ഉയർന്നിരിക്കുന്നത്. കുടുംബത്തെ സംരക്ഷിക്കണമെന്ന് ആവശ്യപ്പെടുന്നത് കുടുംബത്തിലെ മറ്റൊരു അംഗമായ മുഹമ്മദ് റിയാസാണെന്നും സുരേന്ദ്രൻ ചൂണ്ടിക്കാട്ടി.

‘‘കേരള ഭരണം പിണറായി വിജയന്റെ കുടുംബകാര്യമായി മാറിക്കഴിഞ്ഞു. കമ്യൂണിസ്റ്റ് ആശയം കേരളത്തിൽ പൂർണമായും അപ്രസക്തമായിരിക്കുകയാണ്. കോൺഗ്രസിനെയും മറ്റ് പ്രാദേശിക പാർട്ടികളെയും പോലെ സിപിഎമ്മും കുടുംബ പാരമ്പര്യത്തിലേക്ക് നീങ്ങുകയാണ്’ – സുരേന്ദ്രൻ പറഞ്ഞു.

റോഡ് ക്യാമറയും കെ ഫോണും തട്ടിപ്പാണെന്ന് എല്ലാവർക്കും മനസിലായിക്കഴിഞ്ഞെന്നും സുരേന്ദ്രൻ പറഞ്ഞു. റോഡ് ക്യാമറയിലെ വിവാദ കമ്പനിയായ എസ്ആർഐടി തന്നെയാണ് കെ ഫോണിന്റെയും പിന്നിലുള്ളതെന്ന് സുരേന്ദ്രൻ ചൂണ്ടിക്കാട്ടി.

‘‘കെ ഫോണിന്റെ ചൈനീസ് കേബിളുകൾ വാങ്ങിയതിനു പിന്നിൽ വലിയ ക്രമക്കേട് നടന്നിട്ടുണ്ട്. കേബിളിന്റെ ഗുണനിലവാരം ഉറപ്പുവരുത്താതെ കണക്ഷൻ കൊടുക്കുന്നത് ഉപഭോക്താക്കൾക്ക് ഗുണമല്ല, ദോഷമാണുണ്ടാക്കുക. എത്രപേർക്ക് കണക്ഷൻ നൽകുന്നുണ്ടെന്ന് സർക്കാർ വ്യക്തമാക്കാത്തതാണ് പദ്ധതിയെ സംശയത്തിന്റെ ദൃഷ്ടിയിൽ നിർത്തുന്നത്. കെ-ഫോണിന്റെ ഉദ്ഘാടനത്തിന് വേണ്ടി കോടികളാണ് സർക്കാർ ധൂർത്തടിക്കുന്നത്’ – സുരേന്ദ്രൻ പറഞ്ഞു.

English Summary: K Surendran Takes A Dig At Pinarayi Vijayan And Mohammed Riyas