ഉത്സവം കൂടി മടങ്ങവേ ലോറിയിടിച്ചു, വയോധികയ്ക്ക് ദാരുണാന്ത്യം

കണ്ണൂർ∙ പഴയങ്ങാടി രാമപുരത്തു ചരക്കുലോറി ഇടിച്ചു വയോധികയ്ക്കു ദാരുണാന്ത്യം. ചെറുതാഴം അതിയടം ഭാർഗവി (76) ആണു മരിച്ചത്. ഇന്ന് ഉച്ചയ്ക്കു 12:30 ഓടെയാണ് അപകടം. രാമപുരം ശ്രീ മഹാവിഷ്ണു ക്ഷേത്രത്തിലെ ഉത്സവചടങ്ങിൽ പങ്കെടുത്തു മടങ്ങുകയായിരുന്നു ഭാർഗവി. പിലാത്തറ - പഴയങ്ങാടി കെഎസ്ടിപി റോഡു മുറിച്ചു കടക്കവേ ലോറി ഇടിച്ചു.  

കർണാടകയിലെ ബെൽഗാമിൽനിന്നു പഞ്ചസാരയുമായി കൊച്ചിയിലേക്ക് പോവുകയായിരുന്നു ചരക്കു ലോറി. ലോറിയുടെ അടിയിൽ കുടുങ്ങിയ വയോധികയെ പഴയങ്ങാടി, പരിയാരം പൊലീസ് എത്തിയാണു പുറത്തെടുത്തത്. പയ്യന്നൂരിൽനിന്ന് അഗ്നിശമന സേനയുടെ റെസ്‌ക്യൂ ടീമും അപകട സ്ഥലത്ത് എത്തിയിരുന്നു