തീർഥാടകരുടെ ബസിനു നേരെ ഭീകരാക്രമണം; നിയന്ത്രണം വിട്ട് കൊക്കയിലേക്കു മറിഞ്ഞ് 10 പേർ മരിച്ചു

ശ്രീനഗർ∙ ജമ്മു കശ്മീരിൽ തീർഥാടകർ സഞ്ചരിച്ച ബസിനു നേരെ ഭീകരാക്രമണം. വെടിവയ്പ്പിൽ നിയന്ത്രണം നഷ്ടമായ ബസ് കൊക്കയിലേക്ക് മറിഞ്ഞുണ്ടായ അപകടത്തിൽ 10 പേർ മരിച്ചു. 33 പേർക്കു പരുക്കേറ്റതായി ദേശീയ മാധ്യമങ്ങൾ റിപ്പോർട്ട് ചെയ്തു. ശിവ്ഖോരി ക്ഷേത്രത്തിലേക്ക് പോയ ബസിനു നേരെ തീവ്രവാദികൾ വെടിവയ്ക്കുകയായിരുന്നു.

ആക്രമണത്തിനു പിന്നാലെ നിയന്ത്രണം നഷ്ടമായ ബസ് മലയിടുക്കിലേക്ക് മറിയുകയായിരുന്നു. വെടിവയ്പിൽ ഡ്രൈവർക്ക് ബസിന്റെ നിയന്ത്രണം നഷ്ടമാകുകയായിരുന്നെന്ന് പൊലീസ് പറഞ്ഞു. മരിച്ച യാത്രക്കാരെ തിരിച്ചറിഞ്ഞിട്ടില്ല. സൈന്യത്തിന്റെയും പൊലീസിന്റെയും നേതൃത്വത്തിൽ രക്ഷാപ്രവർത്തനം നടക്കുന്നു.