ആലുവയില്‍ കാണാതായ പെണ്‍കുട്ടികളെ കണ്ടെത്തി; ഗേറ്റ് തുറന്ന് ഇറങ്ങിപ്പോയതെന്നു സംശയം

കൊച്ചി ∙ ആലുവയിൽ നിന്നു കാണാതായ പ്രായപൂർത്തിയാവാത്ത 3 പെൺകുട്ടികളെയും കണ്ടെത്തി. നിർധനരായ പെൺകുട്ടികളെ സംരക്ഷിക്കുന്ന ആലുവ തോട്ടക്കാട്ടുകരയിലെ സ്ഥാപനത്തിൽ നിന്നാണ് ഇന്നലെ രാത്രി ഇവരെ കാണാതായത്. 15, 16, 18 വയസ്സ് പ്രായമുള്ളവരാണ് കുട്ടികൾ. കാണാതായതിൽ ഒരു പെൺകുട്ടി കഴിഞ്ഞ മാസമാണ് സ്ഥാപനത്തിലെത്തിയത്. 

ഓഫിസിനുള്ളിൽ നിന്നും താക്കോലെടുത്ത് ഗേറ്റ് തുറന്നാണ് പെൺകുട്ടികൾ ഇറങ്ങിപ്പോയത് എന്നാണ് വിവരം. പെൺകുട്ടികളെ കാണാതായതിനെ തുടർന്ന് ആലുവ പൊലീസ് കേസെടുത്ത് അന്വേഷണം ആരംഭിച്ചിരുന്നു. സിസി ടിവി ദൃശ്യങ്ങളും പൊലീസ് പരിശോധിച്ചിരുന്നു. തൃശൂർ പുതുക്കാട് വച്ച് കെഎസ്ആർടിസി ബസിൽ നിന്നാണ് ഇന്ന് ഇവരെ കണ്ടെത്തിയത്.