ഭീകരരുടെ സാന്നിധ്യത്തെ കുറിച്ച് വിവരം; ഉധംപൂർ ജില്ലയിൽ രാത്രി സൈന്യത്തിന്റെ തിരച്ചിൽ

ജമ്മു ∙ ഉധംപൂർ ജില്ലയിൽ ഭീകരരുടെ സാന്നിധ്യം സംബന്ധിച്ച് വിവരം ലഭിച്ചതിനെ തുടർന്ന് സൈന്യവും പോലീസും സംയുക്തമായി രാത്രി തിരച്ചിൽ ആരംഭിച്ചു. പട്നിറ്റോപ്പിനടുത്തുള്ള അകർ വനം കേന്ദ്രീകരിച്ചാണ് തിരച്ചിൽ നടത്തുന്നത്.

ഇന്റലിജൻസ് വിവരങ്ങളുടെ അടിസ്ഥാനത്തിൽ ഒരാഴ്ചയായി ഉധംപൂർ ജില്ലയിലെ ബസന്ത്ഗഡ് മേഖലയിൽ ഭീകരരുടെ സംഘത്തെ സുരക്ഷാ സേന നിരീക്ഷിച്ചുവരികയായിരുന്നു. ഭീകരരെ പിടികൂടുന്നതിനുള്ള സൈനിക നടപടി പുരോഗമിക്കുകയുമാണെന്ന് അധികൃതർ അറിയിച്ചു.

കിഷ്ത്വാറിലെ നൗനട്ടയിലും ഉധംപൂർ ജില്ലയിലെ ബസന്ത്ഗഡ് പ്രദേശത്തുമുള്ള വനമേഖലകളിൽ സുരക്ഷാ സേനയും ഭീകരരും തമ്മിൽ ഞായറാഴ്ച രണ്ട് തവണ ഏറ്റുമുട്ടലുണ്ടായി. ഇതേതുടർന്ന് ഭീകരർ സ്ഥലത്ത് നിന്ന് രക്ഷപ്പെട്ടു.