വടകരയിൽ മദ്യപിക്കുന്നതിനിടെ സുഹൃത്തിന് എലിവിഷം ചേർത്ത ബീഫ് നൽകി; യുവാവിന്റെ നില ഗുരുതരം

വടകര ∙ മദ്യപിക്കുന്നതിനിടെ സുഹൃത്തിന് എലിവിഷം ചേർത്ത ബീഫ് നൽകിയ യുവാവിനെതിരെ കേസ്. ബീഫ് കഴിച്ച കുറിഞ്ഞാലിയോട് സ്വദേശി നിധീഷ് ഗുരുതരാവസ്ഥയിൽ ചികിത്സയിലാണ്. നിധീഷിന്റെ സുഹൃത്ത് വൈക്കിലശ്ശേരി സ്വദേശി മഹേഷിനെതിരെയാണ് പൊലീസ് കേസെടുത്തത്.

ജനുവരി ആറിന് ഇരുവരും ഒരുമിച്ചു മദ്യപിച്ചിരുന്നു. മഹേഷ് കൊണ്ടുവന്ന ബീഫാണു നിധീഷ് കഴിച്ചത്. ബീഫിൽ എലിവിഷം ചേർത്തിട്ടുണ്ടെന്ന് നിധീഷിനോട് പറഞ്ഞിരുന്നുവെന്നാണ് മഹേഷ് പറയുന്നത്. തമാശ പറഞ്ഞതാണെന്നു കരുതി നിധീഷ് ബീഫ് കഴിച്ചു. വീട്ടിലെത്തിയ നിധീഷിനു ദേഹാസ്വാസ്ഥ്യം ഉണ്ടായതോടെയാണ് ആശുപത്രിയിൽ പ്രവേശിപ്പിച്ചത്. എലിവിഷം കഴിച്ചുവെന്ന് നിധീഷ് തന്നെയാണു പറഞ്ഞതെന്നാണ് വിവരം. പൊലീസ് അന്വേഷണം നടക്കുകയാണ്.