തൃശൂരിൽ ചിൽഡ്രൻസ് ഹോമിൽ അന്തേവാസികൾ തമ്മിൽ തർക്കം; 17കാരനെ 16കാരൻ തലയ്ക്കടിച്ചു കൊന്നു

തൃശൂർ ∙ രാമവർമപുരം ചിൽഡ്രൻസ് ഹോമിൽ ക്രൂര കൊലപാതകം. അന്തേവാസിയായ 17 വയസ്സുകാരനെ ഇവിടെത്തന്നെ താമസിക്കുന്ന 16 വയസ്സുകാരൻ ചുറ്റികകൊണ്ടു തലയ്ക്കടിച്ചു കൊലപ്പെടുത്തിയെന്നു പൊലീസ് പറഞ്ഞു. ഇരിങ്ങാലക്കുട സ്വദേശിയാണു കൊല്ലപ്പെട്ടത്. വ്യാഴാഴ്ച രാവിലെ ആറോടെയാണു സംഭവം.

വാക്കുതർക്കത്തെ തുടർന്നാണു കൊലപാതകമെന്നാണു പ്രാഥമിക നിഗമനം. ഇന്നലത്തെ പ്രശ്നത്തിന്റെ തുടർച്ചയായി രാവിലെ ഇരുവരും തമ്മിൽ തർക്കമുണ്ടായി. തുടർന്നാണു തലയ്ക്കടിച്ചത്. ഗുരുതരമായി പരുക്കേറ്റ കുട്ടിയെ തൃശൂർ മെഡിക്കൽ കോളജ് ആശുപത്രിയിലേക്ക് എത്തിച്ചെങ്കിലും രക്ഷിക്കാനായില്ല. മൃതദേഹം മോർച്ചറിയിൽ സൂക്ഷിച്ചിരിക്കുകയാണ്.