നെടുമങ്ങാട് ടൂറിസ്റ്റ് ബസ് അപകടം: ഡ്രൈവറുടെ ലൈസൻസ് റദ്ദാക്കി; അപകടകാരണം അമിതവേഗത

തിരുവനന്തപുരം∙ നെടുമങ്ങാട് ഇരിഞ്ചയത്ത് അപകടത്തിൽപ്പെട്ട ടൂറിസ്റ്റ് ബസിന്റെ ഡ്രൈവർ അരുൾ ദാസിന്റെ ലൈസൻസ് റദ്ദാക്കി. അപകടത്തിനു കാരണം അമിതവേഗതയും ഡ്രൈവറുടെ അശ്രദ്ധയുമാണെന്നാണ് കണ്ടെത്തൽ. ഡ്രൈവറെ സുഹൃത്തിന്റെ വീട്ടിൽനിന്ന് പൊലീസ് അറസ്റ്റു ചെയ്തു. അലക്ഷ്യമായി വാഹനമോടിച്ച് ജീവൻ നഷ്ടപ്പെടുത്തിയതിനാണ് അരുൾ ദാസിനെതിരെ കേസെടുത്തത്. 

ടൂറിസ്റ്റ് ബസിന്റെ ഫിറ്റ്നസും ആർസിയും മോട്ടർ വാഹനവകുപ്പ് റദ്ദാക്കിയിട്ടുണ്ട്. അപകടത്തിൽ ഒട്ടേറെപ്പേർക്ക് പരുക്കേൽക്കുകയും കാവല്ലൂർ സ്വദേശി ദാസിനി (60) മരിക്കുകയും ചെയ്തിരുന്നു. ആശുപത്രികളിൽ ചികിത്സയിലുള്ളവരുടെ നില തൃപ്തികരമാണ്. പെരുങ്കടവിളയിൽനിന്ന് മൂന്നാറിലേക്ക് വിനോദയാത്ര പോയ സംഘം സഞ്ചരിച്ച ബസാണ് അപകടത്തിൽപ്പെട്ടത്.