ഒബാമ ക്വിയർ വ്യക്തി, മിഷേൽ സ്ത്രീ വേഷം ധരിക്കുന്ന പുരുഷൻ: ആരോപണവുമായി ഇലോൺ മസ്‌കിന്റെ പിതാവ്
Mail This Article
വാഷിങ്ടൻ ∙ യുഎസ് മുൻ പ്രസിഡന്റ് ബറാക് ഒബാമ ക്വിയർ വ്യക്തിയാണെന്നും അദ്ദേഹത്തിന്റെ ഭാര്യ മിഷേൽ ഒബാമ സ്ത്രീ വേഷം ധരിക്കുന്ന പുരുഷനാണെന്നും ഇലോൺ മസ്‌കിന്റെ പിതാവ് ഇറോൾ മസ്ക്. ഒരു പോഡ്കാസ്റ്റ് പരിപാടിയിൽ സംസാരിക്കുമ്പോഴാണ് ഇറോൾ മസ്‌കിന്റെ പ്രസ്‌താവന. തങ്ങൾക്ക് എല്ലാവർക്കും ഇത് അറിയാമെങ്കിലും പൊതുവിൽ ഇതാർക്കും അറിയില്ലെന്നും ഇറോൾ മസ്ക് പറഞ്ഞു.
ഇതോടെ മിഷേൽ ഒബാമ ഒരു പുരുഷനാണോയെന്ന് അവതാരകൻ തിരിച്ചു ചോദിച്ചു. തീർച്ചയായും, നിങ്ങൾക്കത് അറിയില്ലേയെന്നായിരുന്നു ഇറോളിന്റെ മറുപടി. 2014ൽ മിഷേലിന്റെ ലിംഗഭേദത്തെ കുറിച്ച് ഹാസ്യതാരം ജോൺ റിവേഴ്സ് നടത്തിയ പരാമർശത്തിനു പിന്നാലെ അദ്ദേഹം മരിച്ചത് ഇറോൾ ചൂണ്ടിക്കാട്ടി. ‘‘അവർ ജോൺ റിവേഴ്‌സിനെ കൊലപ്പെടുത്തി. അതു പൊതുവായ അറിവാണ്. നിങ്ങൾക്ക് അത് എവിടെയും നോക്കാം’’ – ഇറോൾ മസ്ക് പറഞ്ഞു.
മിഷേലിന്റെ ലിംഗഭേദത്തെക്കുറിച്ച് പരാമർശം നടത്തി രണ്ട് ആഴ്ചകൾക്കു ശേഷം 2014 സെപ്റ്റംബർ നാലിനാണ് ജോൺ റിവേഴ്സ് മരിക്കുന്നത്. എന്നാൽ അത് കൊലപാതകമാണെന്ന് കണ്ടെത്തിയിട്ടില്ല. തന്റെ മകൻ ഇലോൺ ഒരു നല്ല പിതാവല്ലെന്നും മാതാപിതാക്കളുടെ കഴിവുകളെ വിമർശിച്ചുവെന്നും ഇറോൾ മസ്ക് അഭിമുഖത്തിനിടെ പറയുന്നു. ഇലോൺ തന്റെ കുട്ടികളുടെ ജീവിതത്തിൽ നിന്ന് വലിയ തോതിൽ വിട്ടുനിൽക്കുകയാണെന്നും അദ്ദേഹം ആരോപിച്ചു.