പത്രം വായിച്ചു കൊണ്ടിരുന്നയാൾക്ക് നേരെ പാഞ്ഞടുത്ത് കാട്ടുപന്നി; യുവാവ് ഓടിമാറിയത് രക്ഷയായി– വിഡിയോ

കോഴിക്കോട്∙ കൊടുവള്ളി നരിക്കുനിയിൽ വീടിന്റെ വരാന്തയിലിരുന്ന് പത്രം വായിക്കുകയായിരുന്ന യുവാവിനെ കുത്താൻ പാഞ്ഞടുത്ത് കാട്ടുപന്നി. ചൊവാഴ്ച രാവിലെ എട്ടുമണിയോടെയായിരുന്നു സംഭവം. കാട്ടുപന്നിയെ കണ്ട യുവാവ് ഓടി വീടിനുള്ളിലേക്ക് കയറിയതിനാൽ കുത്തേൽക്കാതെ രക്ഷപ്പെട്ടു. പന്നി ഓടി വരുന്നതിന്റെ സിസിടിവി ദൃശ്യങ്ങളും പുറത്തു വന്നു.

രാവിലെ വീടിന്റെ വരാന്തയിലിരുന്ന് പത്രം വായിക്കുകയായിരുന്നു പാലങ്ങാട് സലീം. ഇതിനിടെയാണ് കാട്ടുപന്നി വലിയ ശബ്ദത്തോടെ തുറന്നിട്ട ഗെയ്റ്റിലൂടെ വീട്ടിലേക്കു പാഞ്ഞെത്തിയത്. സലീം ഓടിമാറിയതോടെ കാട്ടുപന്നി തിരി‍ഞ്ഞ് മുറ്റത്തേക്ക് പോകുകയായിരുന്നു. പ്രദേശത്ത് കുട്ടികൾ സ്കൂളിൽ പോകുന്ന സമയത്തും കാട്ടുപന്നി അക്രമ സ്വഭാവത്തോടെ ഓടിനടക്കാറുണ്ടെന്നാണ് പ്രദേശവാസികൾ പറയുന്നത്.