മന്ത്രിപദം മോഹിച്ചു, ഒടുവിൽ‌ പാർട്ടിയുടെ താക്കോൽ‌; തോമസ് കെ. തോമസ് എൻസിപി സംസ്ഥാന അധ്യക്ഷൻ

മുംബൈ∙ തോമസ് കെ. തോമസിനെ എൻസിപി സംസ്ഥാന അധ്യക്ഷനായി പ്രഖ്യാപിച്ചു. ദേശീയ നേതൃത്വത്തിന്റേതാണു പ്രഖ്യാപനം. സംസ്ഥാന ഭാരവാഹികളുടെ യോഗം തോമസ് കെ. തോമസിനെ അധ്യക്ഷനാക്കാൻ നേരത്തേ തീരുമാനിച്ചിരുന്നു. കുട്ടനാട് എംഎൽഎയാണു തോമസ് കെ. തോമസ്. പി.എം. സുരേഷ് ബാബു, പി.കെ. രാജൻ എന്നിവരാണ് വർക്കിങ് പ്രസിഡന്റുമാർ. ഇരുവരും പി.സി. ചാക്കോയുടെ അനുകൂലികളാണ്.

തോമസ് കെ. തോമസിനെ മന്ത്രിയാക്കാൻ ഇറങ്ങിത്തിരിച്ച പി.സി. ചാക്കോയുടെ അപ്രതീക്ഷിത രാജിക്ക് പിന്നാലെയാണ് പുതിയെ അധ്യക്ഷനെ എൻസിപി പ്രഖ്യാപിച്ചത്. ശശീന്ദ്രൻ വിഭാഗവും തോമസിനെ പിന്തുണക്കുകയായിരുന്നു. സമവായത്തിന്റെ ഭാഗമായി പി.സി. ചാക്കോ, ശശീന്ദ്രൻ, തോമസ് കെ. തോമസ് എന്നിവരുമായി പാർട്ടി ദേശീയ അധ്യക്ഷൻ ശരദ് പവാർ കൂടിക്കാഴ്ച നടത്തിയിരുന്നു.