പാലാ നഗരസഭ ചെയർമാൻ തിരഞ്ഞെടുപ്പ്: കേരള കോൺഗ്രസ് (എം)ലെ തോമസ് പീറ്ററിന് വിജയം

കോട്ടയം∙ പാലാ നഗരസഭ ചെയർമാനായി കേരള കോൺഗ്രസി(എം) ലെ തോമസ് പീറ്റർ തിരഞ്ഞെടുക്കപ്പെട്ടു . യുഡിഎഫിലെ ജോസ് എടേട്ടിനെയാണ് തോമസ് പീറ്റർ പരാജയപ്പെടുത്തിയത്. എൽഡിഎഫ് സ്ഥാനാർഥിയായ തോമസിന് 16 വോട്ടുകളും യുഡിഎഫിന്റെ ജോസ് എടേട്ടിന് 9 വോട്ടുകളും ലഭിച്ചു.  കേരള കോൺഗ്രസ (എം)ലെ ഷാജു.വി.തുരുത്തനെ കേരള കോൺഗ്രസ് (എം) തന്നെ അവിശ്വാസത്തിലൂടെ പുറത്താക്കിയിരുന്നു.

ഇതിനു പിന്നാലെയാണ് തിരഞ്ഞെടുപ്പ് നടന്നത്. വിദേശത്ത് ആയ സിപിഐ കൗൺസിലർ ആർ.സന്ധ്യ ഒഴികെയുള്ള ഭരണപക്ഷത്തെ മുഴുവൻ വോട്ടുകളും തോമസ് പീറ്ററിനു ലഭിച്ചു. അതേസമയം, സിപിഎം പുറത്താക്കിയ കൗൺസിലർ ബിനു പുളിക്കക്കണ്ടവും തോമസ് പീറ്ററിനാണ് വോട്ട് ചെയ്തത്.

ഭരണപക്ഷമായ എൽഡിഎഫിൽ കേരള കോൺഗ്രസ് (എം)-10, സിപിഎം-4, സിപിഐ-1 എന്നിങ്ങനെയാണ് കക്ഷിനില. യുഡിഎഫിൽ കോൺഗ്രസ്-5, കേരള കോൺഗ്രസ്-3, യുഡിഎഫ് സ്വതന്ത്രൻ-1 എന്നിങ്ങനെ 9 അംഗങ്ങളാണുള്ളത്. 26 അംഗ കൗൺസിലാണ് പാലാ നഗരസഭയിലേത്.