കനത്ത മഴയ്ക്കിടെ ഓടയിൽ വീണു; കോഴിക്കോട്ട് ഒരാൾ മരിച്ചു

കോഴിക്കോട് ∙ കനത്ത മഴയിൽ നിറഞ്ഞൊഴുകിയ ഓടയിൽ വീണ് ഒരാൾ മരിച്ചു. കോവൂർ സ്വദേശി ശശി (60) ആണ് ഞായർ രാത്രി 8.30 ന് ഓടയിൽ വീണത്. കോവൂർ എംഎൽഎ റോഡിൽ മണലേരിതാഴത്തെ ബസ് സ്റ്റോപ്പിൽ നിൽക്കുകയായിരുന്ന ശശി അബദ്ധത്തിൽ കാൽവഴുതി ഓടയിൽ വീഴുകയായിരുന്നു. കനത്ത മഴയെത്തുടർന്നാണ് ശശിയും സുഹൃത്തും ബസ്‌ സ്റ്റോപ്പിൽ കയറിനിന്നത്. 

റോഡിനോടു ചേർന്നുള്ള ഓടയിൽ മഴവെള്ളം നിറഞ്ഞിരുന്നു. പൊലീസും അഗ്നിരക്ഷാ സേനയും പ്രദേശവാസികളും തിരച്ചിൽ നടത്തിയെങ്കിലും രാത്രി മൃതദേഹം കണ്ടെത്തിയിരുന്നില്ല. ഇന്നു രാവിലെയാണ് മൃതദേഹം കണ്ടെത്തിയത്.