വെടിക്കെട്ടാവേശത്തിലേക്ക് പൂരനഗരി; കഴിഞ്ഞ വർഷം ആവർത്തിക്കാതിരിക്കാൻ ശ്രദ്ധയോടെ പൊലീസ്

തൃശൂർ ∙ മനസ്സിലും മാനത്തും കാഴ്ചകൾ നിറച്ച പൂരത്തിന്റെ ആവേശത്തിൽ തേക്കിൻകാട് കുടകൾ മാറി മാറി വിരിഞ്ഞു. തെക്കോട്ടിറക്കം പൂർത്തിയാക്കിയ ഭഗവതിമാരുടെ തിടമ്പേറ്റിയ കൊമ്പൻമാർ കൂടിനിന്ന ആൾക്കൂട്ടത്തെ ആവേശത്തിൽ ആറാടിച്ചു. ഇനി കാത്തിരിപ്പിന്റെ മണിക്കൂറുകൾ ആണ്. പുലർച്ചെ 3 മണിയോടെ ആരംഭിക്കുന്ന വെടിക്കെട്ടിനായി നഗരം ഒരുങ്ങിക്കഴിഞ്ഞു. ആദ്യം തിരുവമ്പാടിയാണ് വർണക്കാഴ്ചകളുടെ വിസ്മയത്തിന് തിരിക്കൊളുത്തുക. മൂന്നരയോടെ പാറമേക്കാവിന്റെ വെടിക്കെട്ടും മാനത്ത് നിറത്തിന്റെ ‘പൂരം’ തീർക്കും.

അതേസമയം കഴിഞ്ഞ വർഷം രാത്രി പൂരം അലങ്കോലമായതോടെ കൊച്ചിന്‍ ദേവസ്വം ബോര്‍ഡ് ഓഫിസില്‍ മണിക്കൂറുകള്‍ നീണ്ട ചര്‍ച്ചകളാണ് കലക്ടറുടെ നേതൃത്വത്തിൽ നടന്നത്. ഒടുവിൽ തിരുവമ്പാടി, പാറമേക്കാവ് ദേവസ്വം ഭാരവാഹികള്‍ ചര്‍ച്ച നടത്തി സമവായത്തിലെത്തുകയായിരുന്നു.. വെളുപ്പിന് അഞ്ചു മണിയോടെ ചര്‍ച്ചകള്‍ തീര്‍ന്ന് വെടിക്കെട്ട് നടത്താന്‍ ഇരുകൂട്ടരും തീരുമാനിക്കുകയും ചെയ്തു. എന്നാൽ ഇക്കുറി രാത്രി പൂരത്തിന് പരിചയ സമ്പന്നരായ ഉദ്യോഗസ്ഥരെയാണ് പൂരനഗരിയിൽ നിയോഗിച്ചിരിക്കുന്നത്. പ്രതിസന്ധിയില്ലാതെ പൂരം നടത്തുക എന്നതാണ് ലക്ഷ്യം. കഴിഞ്ഞ വർഷത്തെ പോലെ കാർക്കശ്യ ബുദ്ധിയോടെ പൊലീസ് പെരുമാറില്ലെന്ന് തന്നെയാണ് പൂരം നടത്തിപ്പുകാരുടെയും പ്രതീക്ഷ.