രണ്ടാഴ്ചയായി കാണാനില്ല, മൃതദേഹം വീടിനു സമീപത്തെ പൊട്ടക്കിണറ്റിൽ; അന്വേഷണം

പുത്തൂർ (കൊല്ലം) ∙ രണ്ടാഴ്ചയായി കാണാതായിരുന്ന മധ്യവയസ്കന്റെ മൃതദേഹം പൊട്ടക്കിണറ്റിൽ. പവിത്രേശ്വരം ഇടവട്ടം ഹരിവിലാസത്തിൽ മണിയുടെ (58) മൃതദേഹമാണ് പൊട്ടക്കിണറ്റിൽ കണ്ടെത്തിയത്. മേയ് 15 മുതൽ മണിയെ കാണാനില്ലെന്ന പരാതിയിൽ ഏഴുകോൺ പൊലീസ് അന്വേഷണം നടത്തി വരുകയായിരുന്നു. 

താമസിച്ചു കൊണ്ടിരുന്ന വാടകവീടിന് ഏറെ അകലെയല്ലാത്ത പൊട്ടക്കിണറ്റിലാണ് മൃതദേഹം കണ്ടെത്തിയത്. മൃതദേഹത്തിനു ദിവസങ്ങളുടെ പഴക്കമുണ്ട്. വിവാഹിതനായ മണി കുറച്ചുദിവസമായി വാടകവീട്ടിൽ ഒറ്റയ്ക്കായിരുന്നു താമസം. വീട് പുറത്തു നിന്നും പൂട്ടിയ നിലയിലായിരുന്നു. വീട് തുറന്നുനോക്കിയപ്പോൾ മണിയുടെ ഫോണും കണ്ണടയും ചെരുപ്പും വീടിനുള്ളിൽ തന്നെയുണ്ടായിരുന്നു. സംഭവത്തിൽ ദുരൂഹത ഉണ്ടോയെന്ന കാര്യം അന്വേഷിച്ചു വരികയാണെന്നു പൊലീസ് പറഞ്ഞു.