ഇന്ത്യൻ പതാക വച്ച് കുട്ടികൾ നൃത്തം ചെയ്തു; പാക്ക് സ്കൂളിന്റെ അംഗീകാരം പോയി

കറാച്ചി ∙ ഇന്ത്യൻ ദേശീയ പതാകയുടെ പശ്ചാത്തലത്തിൽ വിദ്യാർഥികൾ ഇന്ത്യൻ ഗാനം ആലപിച്ച് നൃത്തം വയ്ക്കുന്ന വിഡിയോ പ്രചരിച്ചതിനെ തുടർന്നു പാക്കിസ്ഥാൻ അധികൃതർ മമ്മ ബേബി കെയർ കേംബ്രിജ് സ്കൂളിന്റെ റജിസ്ട്രേഷൻ സസ്പെൻഡ് ചെയ്തു. രാജ്യത്തിന്റെ അന്തസ്സിനു മുറിവേൽപ്പിക്കുന്നതാണു സംഭവമെന്ന് അധികൃതർ പറഞ്ഞു. എന്നാൽ, വിവിധ രാജ്യങ്ങളുടെ സംസ്കാരത്തെക്കുറിച്ചു കുട്ടികൾക്ക് അറിവു നൽകുന്നതിനായി സംഘടിപ്പിച്ചതായിരുന്നു പരിപാടിയെന്നു സ്കൂൾ വൈസ് പ്രിൻസിപ്പൽ ഫാത്തിമ പറഞ്ഞു.

സൗദി അറേബ്യ, യുഎസ്, ഈജിപ്ത്, പാക്കിസ്ഥാൻ, ഇന്ത്യ എന്നീ രാജ്യങ്ങളുടെ സാംസ്കാരിക വൈവിധ്യം സംഗീതത്തിലൂടെയും നൃത്തത്തിലൂടെയും വ്യക്തമാക്കുന്ന ബോധവൽക്കരണ പരിപാടിയിലെ ഒരുഭാഗം മാത്രം പ്രചരിപ്പിച്ചതാണ് തെറ്റിദ്ധാരണയ്ക്കു കാരണമെന്നും അറിയിച്ചു.