മുഴുവൻ ഓസ്കറുകളും തൽസമയം കാണാം

ലൊസാഞ്ചലസ് ∙ ഈ മാസം 24 ന് എല്ലാ ഓസ്കർ പുരസ്കാരങ്ങളും തൽസമയം തന്നെ ടിവിയിൽ കാണാം. സമയം ലാഭിക്കാൻ വേണ്ടി 4 പുരസ്ക്കാരങ്ങൾ ടിവി ഷോയിലെ പരസ്യങ്ങളുടെ സമയത്തു നൽകാനുള്ള നീക്കം അക്കാദമി ഓഫ് മോഷൻ പിക്ചർ ആർട് ആൻഡ് സയൻസസ് ഉപേക്ഷിച്ചു.

ഇത്തവണ ഛായാഗ്രഹണം, എഡിറ്റിങ്, മേക്കപ്പ്, ഷോർട് ഫിലിം എന്നീ പുരസ്കാരങ്ങൾ പരസ്യ ഇടവേളയിൽ നൽകാനായിരുന്നു തീരുമാനം. ഓരോ വർഷവും ഈ 4 എണ്ണം മാറിക്കൊണ്ടിരിക്കുമെന്നും പ്രഖ്യാപിച്ചു. തൽസമയ സംപ്രേഷണം 3 മണിക്കൂറിൽ ചുരുക്കാനായിരുന്നു ഈ മാറ്റം. എന്നാൽ, വ്യാപകഎതിർപ്പുണ്ടായതോടെ, സംഘാടകർ പിന്മാറി.