ഇന്ത്യ– യുഎസ് പ്രതിരോധ ഇടപാട് 1.28 ലക്ഷം കോടി
Mail This Article
വാഷിങ്ടൻ ∙ പ്രതിരോധ മേഖലയിൽ ഇന്ത്യ– യുഎസ് വ്യാപാരം ഈ വർഷം 1800 കോടി ഡോളർ (1.28 ലക്ഷം കോടി രൂപ) കവിയുമെന്ന് പെന്റഗൺ വെളിപ്പെടുത്തി. ഇന്ത്യയുമായി ശക്തമായ ബന്ധം തുടർന്നു പോകാൻ യുഎസ് പ്രതിജ്ഞാബദ്ധമാണെന്നും സൈനിക രംഗത്തുൾപ്പെടെ സഹകരണം വ്യാപിപ്പിക്കുമെന്നും യുഎസ് പ്രതിരോധ അണ്ടർ സെക്രട്ടറി എല്ലെൻ എം. ലോർഡ് പറഞ്ഞു.
ഡൽഹിയിൽ അടുത്തയാഴ്ച നടക്കുന്ന 9–ാം ഇന്ത്യ– യുഎസ് പ്രതിരോധ സമിതി (ഡിറ്റിറ്റിഐ) യോഗത്തിന്റെ പശ്ചാത്തലത്തിലാണ് വിശദീകരണം. യോഗത്തിൽ ലോർഡ് പങ്കെടുക്കും. പ്രതിരോധ രംഗത്ത് യുഎസിന്റെ പ്രമുഖ പങ്കാളിയാണ് ഇന്ത്യയെന്നു ലോർഡ് പറഞ്ഞു. നാറ്റോ സഖ്യകക്ഷികളായ ജപ്പാൻ, ദക്ഷിണകൊറിയ, ഓസ്ട്രേലിയ എന്നിവയ്ക്കൊപ്പമാണ് ഇന്ത്യയുടെ സ്ഥാനം. ഇന്തോ– പസിഫിക് മേഖലയിൽ ഇന്ത്യയും സമാന ചിന്താഗതിക്കാരായ രാജ്യങ്ങളുമായി ചേർന്നു പ്രവർത്തിക്കാനാണ് യുഎസ് ആഗ്രഹിക്കുന്നതെന്നും പറഞ്ഞു.