ഇറാഖ്: സമരക്കാർക്ക് നേരെ വെടിവയ്പ്; 22 മരണം

നസിറിയ ∙ ഇറാഖിൽ സർക്കാർ വിരുദ്ധ പ്രക്ഷോഭകർക്കു നേരെ സുരക്ഷാസേന നടത്തിയ വെടിവയ്പിൽ 22 പേർ കൊല്ലപ്പെട്ടു. 180 പേർക്കു പരുക്കേറ്റു. പലരുടെയും നില ഗുരുതരമാണ്. പ്രക്ഷോഭകർ കയ്യടക്കിയ നഗരത്തിലെ 2 പാലങ്ങൾ ഒഴിപ്പിക്കുന്നതിനിടെയാണ് വെടിവയ്പുണ്ടായത്.

ദക്ഷിണ ഇറാഖിലും തലസ്ഥാനമായ ബഗ്ദാദിലും 2 മാസമായി സർക്കാർ വിരുദ്ധ പ്രക്ഷോഭം അലയടിക്കുകയാണ്. അഴിമതിയിൽ മുങ്ങിക്കുളിച്ച സർക്കാർ രാജിവയ്ക്കണമെന്നാണ് ആവശ്യം.

ഷിയ അനുകൂല സർക്കാരിനു പിന്തുണ നൽകുന്ന ഇറാന്റെ നജാഫിലെ കോൺസുലേറ്റിന് കഴിഞ്ഞദിവസം സമരക്കാർ തീവച്ചിരുന്നു. 2 മാസത്തിനിടെ ഇറാഖിലെ തെരുവിൽ കലാപത്തിൽ 350 ലേറെ പേർ മരിച്ചു. 15,000 പേർക്കു പരുക്കേറ്റു.