‘എക്സിറ്റ് ’ പറഞ്ഞ് ഹാരി രാജകുമാരൻ

ലണ്ടൻ ∙ രാജകീയ ചുമതലകളിൽ നിന്ന് ഒഴിഞ്ഞുനിൽക്കാനുള്ള ഹാരി രാജകുമാരന്റെയും (35) ഭാര്യ മേഗൻ മാർക്കിളിന്റെയും (38) തീരുമാനം ബ്രിട്ടിഷ് രാജകുടുംബത്തിനു പ്രഹരമായി. ജ്യേഷ്ഠൻ വില്യം രാജകുമാരനുമായുള്ള അകൽച്ചയെ തുടർന്നാണ് രാജ്യം വിട്ട് സ്വതന്ത്രസംരംഭം തുടങ്ങാൻ സസക്സ് പ്രഭുവും പ്രഭ്വിയുമായ ഇരുവരും തീരുമാനിച്ചത്. ഇനിയുള്ള സമയം അമേരിക്കയിലും യുകെയിലുമായി ചെലവിടുമെന്നും രാജ്ഞിയോടും കോമൺവെൽത്തിനോടുമുള്ള കടപ്പാട് നിലനിർത്താൻ ഏതാനും ചില രാജകീയ ചുമതലകൾ മാത്രം തുടർന്നു വഹിക്കുമെന്നും ഹാരി പറഞ്ഞു.

എലിസബത്ത് രാജ്ഞിയോടും പിതാവ് ചാൾസ് രാജകുമാരനോടും വില്യം രാജകുമാരനോടും ചർച്ച ചെയ്ത ശേഷം വിശദാംശങ്ങൾ അറിയിക്കുമെന്നാണ് ഹാരി വ്യക്തമാക്കിയത്. എന്നാൽ, രാജ്ഞി കടുത്ത നീരസത്തിലാണെന്നാണ് റിപ്പോർട്ട്. സ്വന്തം കാലിൽ നിൽക്കാനും ജീവകാരുണ്യപ്രവർത്തനം നടത്താനുമാണ് ഹാരിയും മേഗനും ഉദ്ദേശിക്കുന്നത്. കിരീടാവകാശത്തിൽ ആറാമനാണ് ഹാരി. വില്യം രണ്ടാമനും. പരിസ്ഥിതി സംരക്ഷണം ഉയർത്തി സ്വകാര്യ വിമാനങ്ങളിൽ ഇവർ നടത്തുന്ന യാത്രകളെയും മറ്റും മാധ്യമങ്ങൾ വിമർശിച്ചതിനെ തുടർന്ന് ചില പ്രസിദ്ധീകരണങ്ങൾക്കെതിരെ അവർ കേസ് കൊടുക്കുകയും ചെയ്തിരുന്നു.