ആസ്റ്റെറിക്സ് സഹ സ്രഷ്ടാവ് ഉദർസോയ്ക്കു വിട

പാരിസ് ∙ ആസ്റ്റെറിക്സ് കോമിക് ബുക്ക് കഥാപാത്രങ്ങൾക്കൊപ്പം പേരെടുത്ത ഫ്രഞ്ച് ഇലസ്ട്രേറ്റർ ആൽബേ ഉദർസോ (92) അന്തരിച്ചു.  ഉദർസോയും എഴുത്തുകാരൻ റെനെ ഗൊസിനിയും ചേർന്ന് 1959 ലാണ് ആസ്റ്റെറിക്സ് കോമിക് പരമ്പര ആരംഭിച്ചത്. പിലൊറ്റ് കോമിക് മാഗസിനു വേണ്ടിയായിരുന്നു പുതിയ ഫ്രഞ്ച് ഹീറോ.

റോമൻ അധിനിവേശത്തിലുള്ള പുരാതന ഗോളിലെ ആസ്റ്റെറിക്സ് എന്ന പോരാളിയും കൂട്ടുകാരൻ ഒബിലിക്സും നായ ഇദെഫിക്സും (ഇംഗ്ലിഷ് പതിപ്പിൽ ഡോഗ്‌മാറ്റിക്സ്) ചേർന്നു നടത്തുന്ന സാഹസിക യാത്രകളാണു പ്രമേയം. 1977 ൽ ഗൊസിനി മരിച്ചതിനു ശേഷവും ഉദർസോ ഒറ്റയ്ക്ക് കഥയെഴുതി ചിത്രം വരച്ച് പരമ്പര തുടർന്നു. 

ലോകമെമ്പാടും കുട്ടികളെയും മുതിർന്നവരെയും വായനയിലേക്ക് കൂടുതൽ അടുപ്പിച്ച ജനപ്രിയ കോമിക് ബുക്കായി ആസ്റ്റെറിക്സ് മാറി. ആൻതിയ ബെല്ലിന്റെതായിരുന്നു ഇംഗ്ലിഷ് പരിഭാഷ. 37 കോടി പുസ്തകങ്ങൾ വിറ്റുപോയി. 11 സിനിമകളുണ്ടായി. ആസ്റ്റെറിക്സ് തീം പാർക്കുമുണ്ട്.   

English summary: Albert Uderzo passes away