രോഗികൾ 900; മരണം 2; പ്രവിശ്യകളടച്ച് സൗദി

ഒരാൾ കൂടി മരിച്ചതോടെ സൗദിയിൽ കോവിഡ് മരണം രണ്ടായി. 133 പേർക്കു കൂടി രോഗം സ്ഥിരീകരിച്ചതോടെ മൊത്തം രോഗബാധിതർ 900. ഇന്നു മുതൽ 13 പ്രവിശ്യാ അതിർത്തികളും അടയ്ക്കും. റിയാദ്, മക്ക, മദീന എന്നിവിടങ്ങളിൽ കർഫ്യൂ ഉച്ച കഴിഞ്ഞ് 3 മുതൽ രാവിലെ 6 വരെയാക്കി.

മറ്റിടങ്ങളിൽ വൈകിട്ട് 7 മുതൽ രാവിലെ 6 വരെ. മക്ക ഹറം പള്ളിയുടെ പ്രധാന കവാടമൊഴികെയെല്ലാം അടച്ചു. കർഫ്യൂ ലംഘിക്കുന്ന ദൃശ്യങ്ങൾ സമൂഹമാധ്യമങ്ങളിലൂടെ പ്രചരിപ്പിച്ചാൽ 5 വർഷം തടവും 30 ലക്ഷം റിയാൽ (കോടിയിലേറെ രൂപ)  പിഴയും ശിക്ഷ. സൗദി ഭരണാധികാരി സൽമാൻ രാജാവിന്റെ അധ്യക്ഷതയിൽ ജി20 ഉച്ചകോടി ഇന്നു വിഡിയോ കോൺഫറൻസിങ് വഴി. ഇതുവരെ 29 പേർ സുഖം പ്രാപിച്ചു.

യുഎഇ: ആരോഗ്യ നിർദേശങ്ങൾ പാലിച്ചില്ലെങ്കിൽ 2 – 10 ലക്ഷം ദിർഹം പിഴയും (ഏകദേശം 41 ലക്ഷം – 2 കോടി രൂപ) തടവുശിക്ഷയും. ആയുർവേദം, ഹോമിയോപ്പതി, യുനാനി, പ്രകൃതിചികിത്സ എന്നിവ താൽക്കാലികമായി നിർത്തിവയ്ക്കണമെന്ന് ദുബായ് ഹെൽത്ത് അതോറിറ്റി.

വീട്ടിലിരിക്കാനുള്ള ഉച്ചഭാഷിണി നിർദേശം മലയാളം ഉൾപ്പെടെ 5 ഭാഷകളിൽ. പൊതു മാർക്കറ്റുകൾ അടച്ചു. സൂപ്പർമാർക്കറ്റും ഫാർമസിയും 24 മണിക്കൂർ. ക്വാറന്റീൻ ലംഘിച്ചതിന്റെ വിഡിയോ പുറത്തുവിട്ട യുവതിയെ അറസ്റ്റ് ചെയ്തു.  85 പേർക്കു കൂടി കോവിഡ് സ്ഥിരീകരിച്ചതോടെ രോഗികൾ 333, സുഖപ്പെട്ടവർ 52. മരണം 2

ഖത്തർ: 4,645 കിടക്കകളുമായി 2 ചികിത്സാ കേന്ദ്രങ്ങൾ സജ്ജം. പൊതുജനാരോഗ്യ നിയമം ലംഘിക്കുന്നവരുടെ കേസുകൾ കൈകാര്യം ചെയ്യാൻ പുതിയ 'ഹെൽത്ത്‌ പ്രോസിക്യൂഷൻ. ബാങ്കുകൾ, പണവിനിമയ സ്ഥാപനങ്ങൾ എന്നിവയുടെ വായ്പാ തിരിച്ചടവുകൾ  6 മാസത്തേക്കു നീട്ടി. രോഗികൾ 526. രോഗവിമുക്തർ-41

ഒമാൻ: 15 ഒമാൻ പൗരന്മാർക്കു കൂടി കോവിഡ് 19 സ്ഥിരീകരിച്ചതോടെ രോഗികൾ 99. സുഖം പ്രാപിച്ചവർ 17. ടാക്സികളിൽ 2 യാത്രക്കാരിൽ കൂടുതൽ പാടില്ല. ക്വാറന്റീനിൽ കഴിയുന്നവർ പുറത്തിറങ്ങുകയോ മറ്റുള്ളവരുമായി ഇടപഴകുകയോ ചെയ്താൽ തടവും പിഴയും. രോഗലക്ഷണം അധികൃതരെ അറിയിച്ചില്ലെങ്കിലും ശിക്ഷ.

ബഹ്റൈൻ: ബഹ്റൈനിൽ ഇന്നു വൈകിട്ട് 7 മുതൽ അവശ്യസാധനങ്ങൾ അല്ലാത്തവ വിൽക്കുന്ന കടകളെല്ലാം അടയ്ക്കും. 16 പേർക്കു കൂടി രോഗം. ആകെ രോഗികൾ 419. സുഖപ്പെട്ടവർ 190. മരണം -3

കുവൈത്ത്: 4 പേർക്കു കൂടി കോവിഡ്. ആകെ രോഗികൾ 195. സുഖപ്പെട്ടവർ 43.  

English summary: COVID 19; Saudi Arabia closes borders