ടിക്ടോക്–ഒറാക്കിൾ കൂട്ടുകെട്ട് അംഗീകരിച്ച് ഡോണൾഡ് ട്രംപ്

വാഷിങ്ടൻ∙ യുഎസിലെ നിരോധനം മറികടക്കാൻ ഒറാക്കിൾ, വോൾമാർട്ട് എന്നീ കമ്പനികളുമായി ടിക്‌ടോക് ഉണ്ടാക്കിയ ധാരണയ്ക്കു പ്രസിഡന്റ് ഡോണൾഡ് ട്രംപിന്റെ അംഗീകാരം. ഇതോടെ ഇന്നലെ പ്രാബല്യത്തിൽ വരേണ്ടിയിരുന്ന ആപ് വിലക്ക് 27ലേക്കു നീട്ടി.

കമ്പനികൾ തമ്മിലുള്ള ധാരണയനുസരിച്ചു ടിക്ടോക് ആപ്പിന്റെ നിയന്ത്രണത്തിനായി മൂന്നു കമ്പനികളും ചേർന്നു ടെക്സസിൽ പുതിയ കമ്പനി രൂപീകരിക്കും. 25,000 അമേരിക്കക്കാർക്ക് ജോലി ലഭിക്കുമെന്നും വിദ്യാഭ്യാസമേഖലയ്ക്കു ടിക്ടോക് 500 കോടി ഡോളർ സംഭാവന നൽകുമെന്നും ട്രംപ് പറഞ്ഞു.

യുഎസിലെ ഉപയോക്താക്കൾക്കായി പ്രത്യേക ക്ലൗഡ് സെർവറും അധിക സുരക്ഷാ സംവിധാനങ്ങളും ഏർപ്പെടുമെന്നും ട്രംപ് വിശദീകരിച്ചു.