ബൈഡനെ പിന്തുണച്ച് വാഷിങ്ടൻ പോസ്റ്റ്

വാഷിങ്ടൻ ∙ യുഎസ് പ്രസിഡന്റ് തിരഞ്ഞെടുപ്പിൽ ഡെമോക്രാറ്റ് സ്ഥാനാർഥി ജോ ബൈഡനെ പിന്തുണച്ച് പ്രമുഖ ദിനപത്രമായ ദ് വാഷിങ്ടൻ പോസ്റ്റ്. മാന്യനും യോഗ്യനുമാണ് ബൈഡനെന്നും യുഎസ് ചരിത്രത്തിലെ ഏറ്റവും മോശം പ്രസിഡന്റ് ഡോണൾഡ് ട്രംപിനെ പുറത്താക്കാൻ ബൈഡനു കഴിയുമെന്നും പത്രം മുഖപ്രസംഗത്തിൽ വ്യക്തമാക്കി.

ട്രംപിനെ പുറത്താക്കാൻ വോട്ടർമാർ തരംതാഴേണ്ടതില്ലെന്നും രാജ്യം നേരിടുന്ന വെല്ലുവിളികളെ കാര്യക്ഷമമായി നേരിടാൻ കഴിവും അനുഭവവുമുള്ളയാളാണ് മുൻ വൈസ് പ്രസിഡന്റായ ബൈഡനെന്നും മുഖപ്രസംഗത്തിൽ പറയുന്നു. ട്രംപിന്റെ ഭരണപരമായ പാളിച്ചകളെ തുടക്കം മുതലേ നിശിതമായി വിമർശിച്ചിരുന്ന മാധ്യമങ്ങളിലൊന്നാണ് ദ് വാഷിങ്ടൻ പോസ്റ്റ്.