യെമൻ: തട്ടിയെടുത്ത കപ്പലിലുള്ളവരുമായി യുഎൻ സംഘം സംസാരിച്ചു

ന്യൂയോർക്ക് ∙ യെമനു സമീപം ഹൂതി വിമതർ പിടിച്ചെടുത്ത യുഎഇ ചരക്കുകപ്പലിലെ ഇന്ത്യക്കാരടക്കമുള്ള ജീവനക്കാരുമായി യുഎൻ മിഷനിലെ അംഗങ്ങൾ സംസാരിച്ചു. യുഎൻ സംഘം അസ് സലിഫ് തുറമുഖത്തും പരിസരത്തും നടത്തിയ പതിവു പട്രോളിങ്ങിനിടെയാണ് തീരത്തോടു ചേർന്നു കിടക്കുന്ന കപ്പലിലെ ജീവനക്കാരുമായി അകലെ നിന്ന് സംസാരിച്ചത്. യെമനിലെ ഹുദൈദ തുറമുഖത്തിനടുത്തു വച്ച് ഈ മാസം 2ന് പിടിച്ചെടുത്ത ‘റവാബി’ എന്ന കപ്പലിലെ 11 ജീവനക്കാരിൽ 7 പേർ ഇന്ത്യക്കാരാണ്. ഇവരെ ഉടൻ വിട്ടയയ്ക്കണമെന്ന് ഇന്ത്യ ആവശ്യപ്പെട്ടിരുന്നു. 

English Summary: UN mission speaks to crew of cargo vessel, seized by Houthi