മൂന്നാമതും പ്രസിഡന്റാകാൻ ഷി ചിൻപിങ്; പാർട്ടി കോൺഗ്രസിന് 2,296 പ്രതിനിധികൾ
Mail This Article
ബെയ്ജിങ് ∙ അടുത്തമാസം 16നു നടക്കുന്ന പാർട്ടി കോൺഗ്രസിലേക്കു 2,296 പ്രതിനിധികൾ തിരഞ്ഞെടുക്കപ്പെട്ടതായി ചൈനീസ് കമ്യൂണിസ്റ്റ് പാർട്ടിയെ ഉദ്ധരിച്ച് ഔദ്യോഗിക മാധ്യമങ്ങൾ റിപ്പോർട്ട് ചെയ്തു.
ചൈന പ്രസിഡന്റ് ഷി ചിൻ പിങ്ങിനെ സൈനിക അട്ടിമറിയിലൂടെ പുറത്താക്കിയെന്ന അഭ്യൂഹം വ്യാപിക്കുന്നതിനിടെയാണിത്. ഷി ചിൻ പിങ്ങിന്റെ മാർഗനിർദേശം അനുസരിച്ചാണ് 20 –ാം ദേശീയ കോൺഗ്രസിലേക്കുള്ള പ്രതിനിധികളെ തിരഞ്ഞെടുത്തതെന്നും കുറിപ്പിൽ പറയുന്നു. അഞ്ചു വർഷത്തിലൊരിക്കലാണ് പാർട്ടി കോൺഗ്രസ്.
അധികാരത്തിൽ 10 വർഷം പൂർത്തിയാക്കുന്ന ഷി ചിൻപിങ് അടുത്ത 5 വർഷത്തേക്കു കൂടി തുടരാൻ പാർട്ടി കോൺഗ്രസിൽ തീരുമാനമാകുമെന്നാണു സൂചന. മൂന്നാം വട്ടവും അധികാരത്തിൽ തുടരുന്നതിനായുള്ള ഭരണഘടനാഭേദഗതിക്കും പാർട്ടി കോൺഗ്രസ് അംഗീകാരം നൽകും. പാർട്ടിയിലെ 2 ഉന്നതർക്കെതിരെ അഴിമതിക്കേസുകളിൽ കഴിഞ്ഞദിവസം വധശിക്ഷ വിധിച്ചിരുന്നു. ഇതിനു പിന്നാലെയാണു ഷിയെ അട്ടിമറിച്ചെന്ന അഭ്യൂഹം പരന്നത്.
English Summary: China's Communist Party has elected delegates for congress