മംഗോളിയൻ ബാലൻ റിൻപോച്ചെ; യുഎസിൽ ജനിച്ച 8 വയസ്സുകാരനെ തിരഞ്ഞെടുത്തത് ദലൈലാമ

ന്യൂഡൽഹി ∙ യുഎസിൽ പിറന്ന മംഗോളിയൻ ബാലനെ ദലൈലാമ റിൻപോച്ചെയായി തിരഞ്ഞെടുത്തു. ബുദ്ധമതത്തിലെ മൂന്നാമത്തെ അത്യുന്നത പദവിയാണിത്. മംഗോളിയൻ മുൻ പാർലമെന്റ് അംഗത്തിന്റെ ചെറുമകനും യുഎസിലെ പ്രഫസറുടെ ഇരട്ട ആൺകുട്ടികളിലൊരാളുമായ 8 വയസ്സുകാരൻ പത്താമത്തെ റിൻപോച്ചെ ആണ്. ഹിമാചൽപ്രദേശിലെ ധരംശാലയിൽ ഈ മാസം 8ന് നടന്ന ചടങ്ങിൽ ഈ കുട്ടിക്കൊപ്പം ദലൈലാമ പങ്കെടുത്തെന്നാണു വാർത്ത. 

സർക്കാർ ഔദ്യോഗികമായി തിരഞ്ഞെടുത്ത ബുദ്ധമത നേതാക്കളെ മാത്രമേ അംഗീകരിക്കൂ എന്ന നിലപാടുള്ള ചൈനയെ ദലൈലാമയുടെ തീരുമാനം പ്രകോപിപ്പിച്ചേക്കും. 

ബുദ്ധമതത്തിലെ ഏറ്റവും പ്രധാനപ്പെട്ട രണ്ടാമത്തെ ആത്മീയ നേതാവായ പഞ്ചൻ ലാമയെ 1995 ൽ ദലൈലാമ നിശ്ചയിച്ചിരുന്നു. എന്നാൽ, തീരുമാനം പ്രഖ്യാപിച്ച് ദിവസങ്ങൾക്കകം ഈ ബാലനെ ചൈനീസ് സർക്കാർ കുടുംബസമേതം തട്ടിക്കൊണ്ടുപോയി. പിന്നീട് ഇവരെപ്പറ്റി ഒരു വിവരവും ബാഹ്യലോകത്തിനു ലഭിച്ചിട്ടില്ല. ചൈന പിന്നീട് സ്വന്തമായി വേറെ ലാമയെ വാഴിക്കുകയും ചെയ്തു. 

English Summary : Dalai Lama Names US-Born mongolian Boy 3rd Highest Leader In Buddhism