ബെയ്ജിങ് ∙ വിമാന നിർമാണമേഖലയിൽ പടിഞ്ഞാറൻ കമ്പനികളായ ബോയിങ്ങിന്റെയും എയർബസിന്റെയും മേൽക്കോയ്മ തകർക്കാൻ ലക്ഷ്യമിട്ട് ചൈന സ്വന്തമായി നിർ‍മിച്ച യാത്രാവിമാനം ‘സി919’ സർവീസ് തുടങ്ങി. ചൈനയുടെ ഏവിയേഷൻ കോർപറേഷനായ കൊമാക് നിർമിച്ച് ചൈന ഈസ്റ്റേൺ എയർലൈൻസിന്റെ ഉടമസ്ഥതയിലുള്ള വിമാനം 128 യാത്രക്കാരുമായി ഇന്നലെ രാവിലെ ഷാങ്ഹായിൽനിന്നു പറന്നുപൊങ്ങി. 2 മണിക്കൂർ 25 മിനിറ്റിനുശേഷം ഉച്ചയ്ക്ക് 12.31ന് ബെയ്ജിങ്ങിൽ തിരിച്ചിറങ്ങി. 

ചൈനയുടെ വിമാനനിർമാണപദ്ധതി 16 വർഷം മുൻപാണു തുടങ്ങിയത്. ചൈന ഈസ്റ്റേൺ എയർലൈൻസ് ഇത്തരം 5 വിമാനങ്ങൾക്കുള്ള ഓർഡർ നൽകിയിട്ടുണ്ട്. തദ്ദേശീയമായി നിർമിച്ചതെന്നു ചൈന അവകാശപ്പെടുന്നുണ്ടെങ്കിലും ഇരട്ട എൻജിൻ വിമാനത്തിന്റെ എൻജിനും മറ്റു പല ഭാഗങ്ങളും പടിഞ്ഞാറുനിന്നാണെന്നു ബിബിസിയും അൽ ജസീറയും ഉൾപ്പെടെ മാധ്യമങ്ങൾ റിപ്പോർട്ടു ചെയ്തു. ‌

English Summary: Made in China passenger Jet maiden flight