പട്ടാളനിയമക്കേസ്: യൂനിനെ ജയിലിൽനിന്ന് മോചിപ്പിക്കാൻ കോടതി തീരുമാനം

സോൾ ∙ പട്ടാളനിയമം നടപ്പാക്കാൻ ശ്രമിച്ചതിന് ഇംപീച്ച് ചെയ്യപ്പെടുകയും തുടർന്ന് അറസ്റ്റിലാകുകയും ചെയ്ത ദക്ഷിണ കൊറിയ പ്രസിഡന്റ് യൂൻ സുക് യോലിനെ ജയിലിൽനിന്നു മോചിപ്പിക്കാൻ സോൾ സെൻട്രൽ ഡിസ്ട്രിക്ട് കോടതിയുടെ നിർദേശം. ഔദ്യോഗിക അറസ്റ്റിന്റെ കാലാവധി കഴിഞ്ഞതും അറസ്റ്റ് നിയമവിരുദ്ധമെന്നു യൂൻ പരാതിപ്പെട്ടതും പരിഗണിച്ചാണിത്.

ഫെബ്രുവരിയിൽ ഭരണഘടനാ കോടതിയിൽ പൂർത്തിയായ ഇംപീച്ച്മെന്റ് വിചാരണയുടെ വിധി ഉടനെയുണ്ടാകുമെന്നാണു സൂചന. യൂനിനെ പ്രസിഡന്റ് പദവിയിൽനിന്നു നീക്കണോ തുടരാൻ അനുവദിക്കണോ എന്നത് ഉത്തരവിലറിയാം. അട്ടിമറി ആരോപണം അന്വേഷിക്കാനുള്ള നിയമസാധുത അന്വേഷണ ഏജൻസിക്കില്ല എന്നാണ് യൂനിന്റെ അഭിഭാഷകരുടെ വാദം. ഇക്കാര്യത്തിൽ വ്യക്തത വരുത്തണമെന്നും കോടതി നിർദേശിച്ചിട്ടുണ്ട്.