ടിക്‌ടോക്കിന് 75 ദിവസം കൂടി നൽകി ട്രംപ്

വാഷിങ്ടൻ ∙ ചൈനീസ് സാമൂഹിക മാധ്യമമായ ടിക്‌ടോക്കിന് യുഎസിൽ പ്രവർത്തിക്കാൻ 75 ദിവസം കൂടി നൽകി പ്രസിഡന്റ് ഡോണൾഡ് ട്രംപ് ഉത്തരവിട്ടു. ഈ സമയപരിധിക്കുള്ളിൽ യുഎസിൽ ടിക്‌ടോക്കിനെ അമേരിക്കൻ ഉടമസ്ഥതയിൽ കൊണ്ടുവരാനുള്ള പുതിയ കരാറിലെത്തണം.

ചൈനയ്ക്കെതിരെ പകരംതീരുവ ഏർപ്പെടുത്തിയതിനു തിരിച്ചടിയായി അന്നുതന്നെ 34% അധിക തീരുവ ചൈനയും യുഎസിനെതിരെ പ്രഖ്യാപിച്ചിരുന്നു. ടിക്ടോക് വിൽപനയിൽനിന്നു പിന്മാറുന്നുവെന്നു ചൈനീസ് ഉടമസ്ഥരായ ബൈറ്റ്ഡാൻസ് വൈറ്റ് ഹൗസിനെ അറിയിക്കുകയും ചെയ്തു. തുടർന്നാണു ടിക്ടോക് വിൽപന നടന്നാൽ ചൈനയ്ക്കെതിരായ പകരംതീരുവ ഇളവു ചെയ്യാമെന്ന വാഗ്ദാനവുമായി ട്രംപ് രംഗത്തെത്തിയത്. ഇതിനാണ് 75 ദിവസം കൂടി പ്രവർത്തനാനുമതി നൽകിയത്.

സുരക്ഷാകാരണങ്ങൾ ഉന്നയിച്ചാണ് അമേരിക്കയിൽ ടിക്ടോക് ബൈഡൻ ഭരണകൂടം നിരോധിച്ചത്. എന്നാൽ ട്രംപ് ഇടപെട്ടു കാലാവധി നീട്ടിനൽകുകയായിരുന്നു.