ചന്ദ്രനിൽ ആണവനിലയം: രൂപരേഖ ഒരുക്കി ചൈന

ഷാങ്ഹായ് ∙ചന്ദ്രനിൽ നിർമിക്കാനുദ്ദേശിക്കുന്ന ആണവനിലയത്തിന്റെ പ്രാഥമിക രൂപരേഖ ചൈന അവതരിപ്പിച്ചു. റഷ്യയുമായി ചേർന്നു സ്ഥാപിക്കുന്ന രാജ്യാന്തര ചാന്ദ്ര ഗവേഷണകേന്ദ്രം (ഐഎൽആർഎസ്) പ്രവർത്തിപ്പിക്കുന്നതിനുള്ള വൈദ്യുതിക്കുവേണ്ടിയാണു പദ്ധതി. 17 രാജ്യങ്ങളിൽനിന്നുള്ള വിദഗ്ധർ പങ്കെടുത്ത യോഗത്തിൽ ദൗത്യത്തിന്റെ ചീഫ് എൻജിനീയർ ആണ് രൂപരേഖ അവതരിപ്പിച്ചത്.

ചൈനയുമായി ചേർന്ന് 2035 നു മുൻപ് ആണവനിലയം സ്ഥാപിക്കുമെന്ന് റഷ്യൻ സ്പേസ് ഏജൻസി റോസ്കോസ്മോസും കഴിഞ്ഞവർഷം വെളിപ്പെടുത്തിയിരുന്നു.

2030 ൽ ചന്ദ്രനിലേക്ക് മനുഷ്യനെ അയയ്ക്കാൻ മാത്രമല്ല, അവിടെ സ്ഥിരം താവളം സ്ഥാപിക്കാനുമുള്ള ചേഞ്ച്–8 ദൗത്യത്തിനും ചൈന തയാറെടുക്കുകയാണ്.