ഇല്ലായ്മകളുടെ പിടിയില്‍ ശ്രീലങ്ക

HIGHLIGHTS
  • വിദേശ നാണ്യ കരുതല്‍ ശേഖരം നെല്ലിപ്പടി കാണുന്നു
  • ജൈവകൃഷി തീരുമാനവും വിവാദത്തില്‍
videsharangom-what-caused-the-sri-lankan-economic-crisis
Representative Image. Photo Credit : Horst-Koenemund / Shutterstock.com
SHARE

ബേസില്‍ രോഹന രാജപക്സെ ശ്രീലങ്കയിലെ ധനമന്ത്രിയാണെങ്കിലും മന്ത്രിമാത്രമല്ല, പ്രസിഡന്‍റ് ഗോടബയ രാജപക്സെയുടെയും പ്രധാനമന്ത്രി മഹിന്ദ രാജപക്സെയുടെയും അനുജന്‍കൂടിയാണ്. രാജ്യം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോള്‍ അതിനു പരിഹാരം കണ്ടെത്തുകയുംഅങ്ങനെ, ചേട്ടന്മാരുടെ മാനം കാക്കുകയും ചെയ്യുകയെന്ന ഭാരിച്ച ഉത്തരവാദിത്തമാണ് അദ്ദേഹത്തില്‍ വന്നു ചേര്‍ന്നിരിക്കുന്നത്. 

അദ്ദേഹത്തോടൊപ്പം തന്നെ, കേന്ദ്ര ബാങ്കിന്‍റെ പുതിയ ഗവര്‍ണര്‍ അജിത് നിവാര്‍ഡ് കബ്രാലിനെയും ആശ്വാസത്തിനുവേണ്ടി ആകാംക്ഷയോടെ ഉറ്റുനോക്കുകയാണ് ശ്രീലങ്കയിലെ രണ്ടേകാല്‍ കോടിയോളം വരുന്ന ജനങ്ങള്‍. ബേസില്‍ ധനമന്ത്രിയായിട്ട് രണ്ടു മാസമായതേയുള്ളൂ. നമ്മുടെ റിസര്‍വ് ബാങ്കിനു തുല്യമായ ശ്രീലങ്കന്‍ സെന്‍ട്രല്‍ ബാങ്കിന്‍റെ അമരത്തേക്കു കബ്രാല്‍ വീണ്ടും നിയമിതനായിട്ട് ഒരാഴ്ചയും. 

videsharangom-what-caused-the-sri-lankan-economic-crisis-people
People stand in a queue to buy kerosene oil used in cooking stoves in Colombo. Photo Credit : Ishara S. Kodikara / AFP

മുന്‍ഗാമിയായ പ്രശസ്ത സാമ്പത്തിക ശാസ്ത്രജ്ഞന്‍ ഡബ്ളിയു. ഡി. ലക്ഷ്മണ്‍ പെട്ടെന്നു രാജിവച്ചതിനെ തുടര്‍ന്നു ആ സ്ഥാനത്തേക്കു തിരിച്ചുവരികയായിരുന്നു കബ്രാല്‍. അതിനു മുന്‍പ് ധനവകുപ്പില്‍  സഹമന്ത്രിയായിരുന്നു. ലക്ഷ്മണ്‍ രാജിവച്ചത് സാമ്പത്തിക പ്രതിസന്ധി കൈകാര്യം ചെയ്യുന്ന കാര്യത്തില്‍ ഗവണ്‍മെന്‍റുമായി ഉണ്ടായ അഭിപ്രായ ഭിന്നതയെ തുടര്‍ന്നാണെന്നാണ് അഭ്യൂഹങ്ങള്‍. 

സാമ്പത്തിക വിദഗ്ദ്ധന്‍ എന്നതിനേക്കാളേറെ തിരഞ്ഞെടുപ്പ് തന്ത്രജ്ഞന്‍ എന്ന നിലയിലാണ്  ബേസില്‍ രാജപക്സെയുടെ പ്രശസ്തി. ജ്യേഷ്ഠന്മാരെ അധികാരത്തില്‍ എത്തിക്കാനും അതിനുവേണ്ടി ശ്രീലങ്ക പൊതുജന പെരമുന എന്ന പുതിയ പാര്‍ട്ടിക്കു രൂപം നല്‍കാനും തിരഞ്ഞെടുപ്പുകളില്‍ അതിനു തകര്‍പ്പന്‍ വിജയം നേടിക്കൊടുക്കാനുമുളള തന്ത്രങ്ങള്‍ ആവിഷ്ക്കരിച്ചത് അദ്ദേഹമാണത്രേ. സാമ്പത്തിക രംഗത്തും അതുപോലുളള അല്‍ഭുതം കാണിക്കാന്‍ അദ്ദേഹത്തിനു കഴിയുമോ എന്നതു കാണാനിരിക്കുന്നതേയുള്ളൂ. 

ഗുരുതരമായിത്തീര്‍ന്നിരിക്കുകയാണ് ശ്രീലങ്കയിലെ സാമ്പത്തിക സ്ഥിതിഗതികള്‍. അതിനെ നേരിടാനായി പ്രസിഡന്‍റ് ഗോടബയ രാജപക്സെ കഴിഞ്ഞ മാസം അവസാനത്തോടെ രാജ്യത്ത് സാമ്പത്തിക അടിയന്തരാവസ്ഥ നടപ്പാക്കി. ഭക്ഷ്യ വസ്തുക്കള്‍ ഉള്‍പ്പെടെയുള്ള അവശ്യസാധനങ്ങളുടെ ദൗര്‍ലഭ്യം രൂക്ഷമാവുകയും അവയുടെ വില വാണംപോലെ ഉയരുകയും ചെയ്തുകൊണ്ടിരിക്കുന്ന പശ്ചാത്തലത്തില്‍ പൂഴ്ത്തിവയ്പും കരിഞ്ചന്തയും നടന്നുവരുന്നു. 

അതു തടയുകയും ഭക്ഷ്യവിതരണം നിയന്ത്രണാധീനമാക്കുകയുമാണ് അടിയന്തരാവസ്ഥകൊണ്ട് ഉദ്ദേശിക്കുന്നതെന്നു ഗവണ്‍മെന്‍റ് വിശദീകരിക്കുന്നു. ഭക്ഷ്യ ദൗര്‍ലഭ്യമില്ലെന്നും കാര്യങ്ങള്‍ പെരുപ്പിച്ചുകാട്ടി മാധ്യമങ്ങള്‍ അനാവശ്യമായി ഭീതി സ്ൃഷ്ടിക്കുകയാണെന്നുമാണ് അതിനു മുന്‍പ് ഗവണ്‍മെന്‍റ് അവകാശപ്പെട്ടിരുന്നത്.  

കരിഞ്ചന്തയും പൂഴ്ത്തിവയ്പും തടയുന്ന ജോലി പട്ടാളത്തെ ഏല്‍പ്പിച്ചിരിക്കുകയാണ്.  അവശ്യ സാധനങ്ങള്‍ ന്യായവിലയക്കു ജനങ്ങള്‍ക്കു ലഭ്യമാക്കുന്നകാര്യം ഉറപ്പുവരുത്താനായി ഒരു റിട്ട. മേജര്‍ ജനറലിനെ എസ്സന്‍ഷ്യല്‍ സര്‍വീസസ്  കമ്മിഷണര്‍ ജനറലായി നിയമിക്കുകയും ചെയ്തു. കച്ചവടക്കാര്‍ അമിത വിലയക്കു വില്‍ക്കാന്‍ സൂക്ഷിച്ചിട്ടുള്ള സ്റ്റോക്കുകള്‍ പിടിച്ചെടുക്കാന്‍ അദ്ദേഹത്തിന് അധികാരം നല്‍കിയിട്ടുമുണ്ട്. അതേസമയം, ഇത്തരം കാര്യങ്ങളില്‍ പട്ടാളത്തിന്‍റെ ഇടപെടല്‍ ഉണ്ടാകുന്നതു വെളുക്കാന്‍ തേച്ചതു പാണ്ടായതുപോല ആകുമോ എന്ന വിമര്‍ശനവും ഉയര്‍ന്നിരിക്കുകയാണ്. 

ഭക്ഷ്യ ധാന്യങ്ങള്‍ ഉള്‍പ്പെടെയുള്ള അവശ്യ സാധനങ്ങള്‍ മിക്കതും ശ്രീലങ്ക ഇറക്കുമതി ചെയ്യുകയാണ്. അതിനാവശ്യമായ വിദേശനാണ്യ കരുതല്‍ നിക്ഷേപം നെല്ലിപ്പടി കാണാന്‍ തുടങ്ങിയിരിക്കുന്നതാണ് പ്രശ്നങ്ങളുടെയെല്ലാം കാതല്‍. അതു കാരണം പല അവശ്യ വസ്തുക്കളുടെയും ഇറക്കുമതി നിരോധിക്കാന്‍ ഗവണ്‍മെന്‍റ്  നിര്‍ബന്ധിതമായി. സുപ്പര്‍ മാര്‍ക്കറ്റുകളുടെയും ഫാര്‍മസികളുടെയും മുന്നില്‍ ജനങ്ങള്‍ ക്യൂ നില്‍ക്കുമ്പോള്‍ കാലിയായ ഷെല്‍ഫുകള്‍ അവയ്ക്കകത്തുനിന്ന് അവരെ തുറിച്ചുനോക്കുന്നു. 

വിദേശ നാണ്യ കരുതല്‍ ശേഖരം 2019 നവംബറില്‍  ഗോടബയ പ്രസിഡന്‍റായി സ്ഥാനമേല്‍ക്കുമ്പോള്‍ 750 കോടി ഡോളറായിരുന്നു. ഇക്കഴിഞ്ഞ ജൂലൈ അവസാനത്തില്‍ അതു 280 കോടി ഡോളറായി കുറഞ്ഞു. കഷ്ടിച്ച് രണ്ടു മാസത്തേക്കുള്ള ഇറക്കുമതിക്കു മാത്രമേ ഇതു മതിയാവുകയുള്ളൂവത്രേ. അവശ്യസാധനങ്ങള്‍ വാങ്ങാന്‍ മാത്രമേ വിദേശനാണ്യം ഉപയോഗിക്കുന്നുള്ളൂവെന്ന് ഉറപ്പുവരുത്താനും പട്ടാളത്തിന് അധികാരം നല്‍കിയിട്ടുണ്ട്. ഒരു യുഎസ് ഡോളറിനു 200 ശ്രീലങ്കന്‍ രൂപയിലധികം നല്‍കുന്നതു കേന്ദ്രബാങ്ക് നേരത്തെതന്നെ നിരോധിച്ചിരുന്നു.  

videsharangom-basil-rajapaksa-sri-lanka-politics
Basil Rajapaksa. Photo Credit : AFP

വന്‍തോതില്‍ ഡോളര്‍ നേടിക്കൊടുത്തിരുന്ന ടൂറിസം വ്യവസായത്തില്‍ നിന്നുളള വരുമാനം നിലച്ചതാണ് സ്ഥിതിഗതികള്‍ ഇത്രയും ഗുരുതരമാക്കിത്തീര്‍ത്തത്. മൊത്തം ആഭ്യന്തര ഉല്‍പ്പാദനത്തിന്‍റെ (ജിഡിപി) പത്തു ശതമാനമായിരുന്നു ടൂറിസത്തില്‍നിന്നുള്ള വരുമാനം. വര്‍ഷത്തില്‍ ശരാശരി 23 ലക്ഷം ടൂറിസ്റ്റുകള്‍ വരികയും അവരിലൂടെ 300 മുതല്‍ 500 വരെ കോടി ഡോളര്‍ ശ്രീലങ്കയ്ക്കു ലഭിക്കുകയും ചെയ്യുമായിരുന്നു. കോവിഡ് മഹാമാരി മൂലമുള്ള തുടര്‍ച്ചയായ ലോക്ക്ഡൗണുകള്‍ക്കുശേഷം ഈ വര്‍ഷം ജൂലൈവരെ വന്ന ടൂറിസ്റ്റുകള്‍ 19,300.

2019ലെ ഈസ്റ്റര്‍ ദിനത്തിലുണ്ടായ ഭീകരാക്രമണത്തോടെതന്നെ ടൂറിസം മേഖല തളരാന്‍ തുടങ്ങിയിരുന്നു. ക്രൈസ്തവ ദേവാലയങ്ങളിലും വന്‍കിട ഹോട്ടലുകളിലും ഉണ്ടായ ചാവേര്‍ ബോംബാക്രമണങ്ങളില്‍ മുന്നൂറോളം പേരാണ് കൊല്ലപ്പെട്ടിരുന്നത്.  

അതിനു തൊട്ടുപിന്നാല കോവിഡ് മഹാമാരിയും വന്നെത്തിയതോടെ ടൂറിസ്റ്റുകള്‍ ശ്രീലങ്കയില്‍ വരാതായി. കോവിഡിനെ കൈകാര്യം ചെയ്യുന്നതില്‍ ഗവണ്‍മെന്‍റ് തീര്‍ത്തും പരാജയപ്പെട്ടുവെന്ന വിമര്‍ശനം ഇതിന്‍റെ മറ്റൊരു വശമാണ്. പ്രവാസികള്‍ അയച്ചുകൊണ്ടിരുന്ന പണത്തിന്‍റെ അളവിലും കോവിഡ് കാര്യമായ ഇടിവുണ്ടാക്കി. 

വികസന പദ്ധതികള്‍ക്കു വേണ്ടി പല ഭാഗങ്ങളില്‍നിന്നുമായി ശ്രീലങ്ക വാങ്ങിയ കടം വായ്പകളുടെ തിരിച്ചടവും വിദേശനാണ്യ കരുതല്‍ ശേഖരം കുറയാന്‍ കാരണമായിട്ടുണ്ട്. ഇക്കഴിഞ്ഞ ജൂലൈയില്‍ ഇങ്ങനെ അടച്ചുവീട്ടിയത് 100 കോടി ഡോളറാണ്. അടുത്ത വര്‍ഷം ജനുവരിയിലും ജൂലൈയിലുമായി 150 കോടി ഡോളര്‍ ഇനിയും അടച്ചുവീട്ടാനുണ്ട്. മൊത്തം കടബാധ്യത 2010ല്‍ ദേശീയ വരുമാനത്തിന്‍റെ 39 ശതമാനമായിരുന്നത് 2019ല്‍ 69 ശതമാനമായി വര്‍ധിച്ചതായി ലോക ബാങ്കിന്‍റെ റിപ്പോര്‍ട്ടില്‍ പറയുന്നു.  

ഈ സാഹചര്യത്തിലാണ് അവശ്യ സാധനങ്ങളുടെ ഇറക്കുമതിക്കായി കൂടുതല്‍ വിദേശനാണ്യം ആവശ്യമായി വന്നത്. അതിനുവേണ്ടി ശ്രീലങ്കന്‍ രൂപയുടെ മൂല്യം കുറക്കേണ്ടിയും വന്നു. ഇതുവരെയായി എട്ടുശതമാനംവരെ കുറച്ചുകഴിഞ്ഞു. ഓഗസ്റ്റ് മധ്യത്തില്‍ ഒരു യുഎസ് ഡോളര്‍ കിട്ടാന്‍ 217 രൂപ കൊടുക്കേണ്ടിയിരുന്ന സ്ഥാനത്ത് ഈ മാസം ആദ്യത്തെ ആഴ്ചയില്‍ കരിഞ്ചന്തയിലെ വില 230 രൂപയിലും കൂടുതലായിരുന്നു. 

കൃഷിയില്‍ രാസവളങ്ങള്‍ ഉപയോഗിക്കുന്നതു ഇക്കഴിഞ്ഞ ഏപ്രില്‍ മുതല്‍ നിരോധിച്ചിരിക്കുകയാണ്. രാസവളങ്ങളും കീടനാശിനികളും ഇറക്കുമതി ചെയ്യുന്നതും നിരോധിച്ചു. ഇതും രാജ്യത്തിന്‍റെ സമ്പദ് രംഗത്തെ അസ്വസ്ഥമാക്കിക്കൊണ്ടിരിക്കുന്നു.   

ലോകത്തു സമ്പൂര്‍ണ ജൈവകൃഷി നടപ്പാക്കുന്ന ആദ്യത്തെ രാജ്യമെന്ന പേരു ശ്രീലങ്കയ്ക്കു നേടിക്കൊടുക്കാനുള്ള യജ്ഞത്തിലാണ് പ്രസിഡന്‍റ ഗോടബയ രാജപക്സെ. ഇതുകാരണം തുടക്കത്തില്‍ കാര്‍ഷികോല്‍പാദനം കുറയുമെങ്കിലും പൊതുജനാരോഗ്യ സംരക്ഷണത്തിലൂടെ ദീര്‍ഘകാലാടിസ്ഥാനത്തില്‍ രാജ്യത്തിനു പ്രയോജനം ഉണ്ടാവുകയേ ചെയ്യുകയുള്ളൂവെന്ന നിലപാടില്‍  അദ്ദേഹം ഉറച്ചുനില്‍ക്കുന്നു. രാസവളങ്ങള്‍ക്കു പകരം കര്‍ഷകര്‍ക്കു ജൈവവളം  ലഭ്യമാക്കാനും ഗവണ്‍മെന്‍റിനു പരിപാടിയുണ്ട്.  

videsharangom-mahinda-rajapaksa-sri-lanka-politics-gotabaya-rajapaksa
Mahinda Rajapaksa and Gotabaya Rajapaksa. Photo Credit : AFP

ജൈവകൃഷി കാരണം തേയിലയുടെയും മറ്റു വാണിജ്യ വിളകളുടെയും ഉല്‍പാദനം പകുതിവരെ കുറയാനിടയുണ്ടെന്നാണ് കാര്‍ഷിക വിദഗ്ദ്ധര്‍ പ്രവചിക്കുന്നത്.  തേയിലയുടെ കാര്യത്തില്‍ മാത്രം കണക്കാക്കപ്പെടുന്ന നഷ്ടം 62 കോടി ഡോളര്‍.      നിലവിലുളളതിനേക്കാള്‍ കൂടുതല്‍ രൂക്ഷമായ പ്രതിസ്ന്ധിക്ക് അതിടയാക്കുമെന്നു വിദഗ്ദ്ധ മുന്നറിയിപ്പ് നല്‍കുന്നു. തേയിലയുടെ ഉല്‍പ്പാദനവുമായി ബന്ധപ്പെട്ട് 30 ലക്ഷം പേര്‍ ജോലിചെയ്യുന്നുണ്ട്. 

രാജ്യാന്തര നാണ്യ നിധി (ഐഎംഎഫ്) പോലുള്ള ആഗോള ധനകാര്യ സ്ഥാപനങ്ങളുടെ  സഹായം തേടുകയാണ് ഗവണ്‍മെന്‍റെ മുന്നിലുള്ള ഒരു രക്ഷാമാര്‍ഗം. പക്ഷേ, ഐഎംഎഫിന്‍റെയും മറ്റും വായ്പ കിട്ടണമെങ്കില്‍ അവര്‍ നിര്‍ദേശിക്കുന്ന കര്‍ശനമായ നിബന്ധനകള്‍  പാലിക്കേണ്ടിവരും. 

റവന്യൂ വരുമാനത്തിന്‍റെ മുക്കാല്‍ ഭാഗത്തിലേറെയും ജീവനക്കാരുടെ ശമ്പളത്തിനും പെന്‍ഷനുമായി നീക്കിവയ്ക്കേണ്ടിവരുന്ന ഗവണ്‍മെന്‍റിന് അതെളുപ്പമായിരിക്കില്ല. ജനങ്ങള്‍ എതിര്‍ക്കുകയും ചെയ്യും. എന്തു ചെയ്യണമെന്ന ചോദ്യത്തിനു മുന്നിലാണ് പ്രസിഡന്‍റ് ഗോടബയ, പ്രധാനമന്ത്രി മഹിന്ദ, ധനമന്ത്രി ബേസില്‍ എന്നീ മൂന്നു രാജപക്സെമാരും.  

ഈ പംക്തിയെക്കുറിച്ചുള്ള അഭിപ്രായങ്ങൾ kobeidulla1234@gmail.com എന്ന മെയിൽ ഐഡിയിൽ പങ്കുവയ്ക്കാം.

Content Summary : Videsharangom Column - What caused the Sri Lankan economic crisis? 

തൽസമയ വാർത്തകൾക്ക് മലയാള മനോരമ മൊബൈൽ ആപ് ഡൗൺലോഡ് ചെയ്യൂ
MORE IN VIDESHARANGOM
SHOW MORE
ഇവിടെ പോസ്റ്റു ചെയ്യുന്ന അഭിപ്രായങ്ങൾ മലയാള മനോരമയുടേതല്ല. അഭിപ്രായങ്ങളുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്. ഇത്തരം അഭിപ്രായ പ്രകടനത്തിന് നിയമനടപടി കൈക്കൊള്ളുന്നതാണ്.
Video

കടക്കെണിയിലാകുമോ കൽക്കരി നിലയങ്ങൾ? ഇരുട്ടിലാകുമോ രാജ്യം? | Manorama Online

MORE VIDEOS
FROM ONMANORAMA