കൊതിയൂറും രുചിയിൽ റെയിൽവേ ചിക്കൻ കറി

കസ്കസും പൊട്ടുകടലയും ചേർത്ത രുചികരമായി  റെയിൽവേ ചിക്കൻ കറി വീട്ടിൽ തയാറാക്കാം.

ചേരുവകൾ

1. ചെറിയ കഷ്ണങ്ങളാക്കിയ ചിക്കൻ - 2 കിലോഗ്രാം
2. തേങ്ങ - 150 ഗ്രാം
3. വറുത്തെടുത്ത ചന ദാൽ (പൊട്ടുകടല )- 25 ഗ്രാം
4. കസ്കസ് - 25 ഗ്രാം
5. കുരുമുളക് -05 ഗ്രാം
6. പെരുംജീരകം - 06 ഗ്രാം
7. ചെറിയ ജീരകം - 10 ഗ്രാം
8. ഗ്രാമ്പു -02 ഗ്രാം
9. മുളകുപൊടി -30 ഗ്രാം
10.മല്ലിപ്പൊടി -30ഗ്രാം
11. മഞ്ഞൾപ്പൊടി -10 ഗ്രാം
12. റിഫൈൻഡ് ഓയിൽ - 150 മില്ലി
13. നീളത്തിൽ അരിഞ്ഞ സവാള - 400 ഗ്രാം
14. നെടുകെ കീറിയ മുളക് - 2 എണ്ണം
15. ഇഞ്ചി വെളുത്തുള്ളി പേസ്റ്റ് - 40 ഗ്രാം
16. തക്കാളി ചെറുതായി അരിഞ്ഞത് - 250 ഗ്രാം
17. തേങ്ങാപ്പാൽ - 40 ഗ്രാം (തേങ്ങാപ്പൊടി × 200 മില്ലി വെള്ളം)
18. ഉപ്പ് - ആവശ്യത്തിന്
19. മല്ലിയില -ആവശ്യത്തിന്

വറവ്
1.ചുവന്ന മുളക് - 4 എണ്ണം
2.കറിവേപ്പില -2 തണ്ട്
3. തക്കോലം -3 എണ്ണം

തയാറാക്കുന്ന വിധം

• ചിക്കൻ നന്നായി കഴുകി  വൃത്തിയാക്കി, വെള്ളം കളഞ്ഞ് വയ്ക്കുക. 
• കസ്കസ് ചൂടുവെള്ളത്തിൽ വേവിച്ചെടുത്ത് മഷി രൂപത്തിൽ അരച്ചെടുക്കുക. കുരുമുളക്, പെരുംജീരകം, ചെറിയ ജീരകം , ഗ്രാമ്പു (ഗരംമസാല ) എന്നീ ചേരുവകൾ ചെറിയ തീയിൽ ചൂടാക്കുക. മുളകുപൊടി, മഞ്ഞൾപ്പൊടി, മല്ലിപ്പൊടി എന്നിവയും ചെറിയ തീയിൽ ചൂടാക്കി മാറ്റി വയ്ക്കുക.
• ചിരവിയ തേങ്ങയും പൊട്ടുകടലയും കസ്കസ് പേസ്റ്റും കൂട്ടത്തിൽ ഗരംമസാല, മല്ലിപ്പൊടി എന്നിവയും മഷി രൂപത്തിൽ അരച്ചെടുക്കുക. കൂടുതൽ വെള്ളം ചേർക്കാതിരിക്കാൻ ശ്രദ്ധിക്കണം.
• ഒരു പാൻ എടുത്ത് ഓയിൽ ചൂടാക്കുക. അതിലേക്ക് നീളത്തിൽ അരിഞ്ഞു വച്ച സവാള ചുവന്ന നിറമാവുന്നത് വരെ വഴറ്റുക. ഇതിലേക്ക് പച്ചമുളക്, ഇഞ്ചി വെളുത്തുള്ളി പേസ്റ്റ് എന്നിവ ചേർത്ത് പച്ച മണം മാറുന്നത് വരെ വഴറ്റുക.
• ഈ ചേരുവയിലേക്ക് മുൻപേ അരച്ചുവച്ചിട്ടുള്ള അരപ്പ് കൂടെ ചേർത്ത് പച്ച മണം മാറുന്നത് വരെ നന്നായി ഇളക്കുക. ഈ മസാലയിലേക്ക് കഴുകി വച്ചിരിക്കുന്ന ചിക്കൻ ചേർത്ത് നന്നായി യോജിപ്പിക്കുക, അതിലേക്ക് അരിഞ്ഞു വച്ചിട്ടുള്ള തക്കാളിയും പാകത്തിന് ഉപ്പും ചേർക്കുക. ഇതിലേക്ക് തേങ്ങാപ്പാലും ആവശ്യത്തിന് വെള്ളവും ചേർത്ത് ചിക്കൻ വേവുന്നത് വരെ മൂടി വയ്ക്കുക. ചിക്കൻ വെന്തതിന് ശേഷം തീ അണയ്ക്കുക.
• ഇതിലേക്ക് ചുവന്ന മുളകും കറിവേപ്പിലയും താക്കോലവും താളിച്ചെടുത്തു കറിയിലേക്ക് ചേർക്കുക. കൂട്ടത്തിൽ കുറച്ചു മല്ലിയില കൂടി വിതറിക്കോളൂ.