വീട്ടിൽ ഓണസദ്യ ഒരുക്കുന്നവർ ഈ 12 കാര്യങ്ങൾ ശ്രദ്ധിക്കൂ

പാഴ്സൽ വാങ്ങുന്നവർ തൽക്കാലം ക്ഷമിക്കുക. കഷ്ടപ്പെട്ടു പാകം ചെയ്ത വിഭവങ്ങൾ രുചിച്ചു നോക്കുമ്പോൾ ഉപ്പ് കൂടി, എരിവ് സഹിക്കാൻ വയ്യ എന്നിങ്ങനെ പരാതികൾ ഉള്ളവർക്കായി രുചിയുള്ള പരിഹാരം പറഞ്ഞു തരുന്നത് പാചക വിദഗ്ധൻ പഴയിടം മോഹനൻ നമ്പൂതിരി.

∙ഓണസദ്യയുടെ കറികളിൽ കല്ലുപ്പ് ചേ‍ർക്കുകയാണ് പൊടിയുപ്പിനെക്കാൾ നല്ലത്. 

∙ ഉപ്പ് ആവശ്യത്തിനു മാത്രം ചേർക്കുക.  കുറഞ്ഞാൽ വീണ്ടും ചേർത്ത് പാകത്തിലാക്കാം, പക്ഷേ അധികമായാൽ കുറയ്ക്കാൻ എളുപ്പമല്ല.

∙അവിയലിന് ഉപ്പ് കൂടിയാൽ തേങ്ങ നന്നായി അരച്ചതും വെളിച്ചെണ്ണയും കൂടുതൽ ചേർക്കുക.

∙സാമ്പാറിന് ഉപ്പ് കൂടിയാൽ ഉരുളക്കിഴങ്ങ് വേവിച്ച് ചേർക്കുക. ഉരുളക്കിഴങ്ങ് വേഗത്തിൽ ഉപ്പ് വലിച്ചെടുക്കും.

∙ഉപ്പേരി വറുക്കാനും കാളൻ പോലുള്ള വിഭവങ്ങൾ പാകം ചെയ്യാനും പായസത്തിനും വിറക് അടുപ്പാണ് നല്ലത്. ഗ്യാസ് അടുപ്പിലെ തീ ഒരു പാത്രത്തിന്റെ നടുഭാഗത്ത് മാത്രം കേന്ദ്രീകരിക്കും.

∙കാളൻ, സാമ്പാർ, പായസം തുടങ്ങിയവ ആദ്യം പാകം ചെയ്യുക. അവിയൽ, തോരൻ, എരിശ്ശേരി തുടങ്ങിയവ രണ്ടാംഘട്ടത്തിൽ മതി. ഉച്ചയൂണിനു തൊട്ടു മുൻപ് പപ്പടം കാച്ചിയെടുത്താൽ മതി.

∙കഴിവതും നാടൻ പച്ചക്കറികൾ വാങ്ങുക. അടുക്കളത്തോട്ടങ്ങളിൽ വിളയുന്ന പച്ചമുളക്, തക്കാളി, പപ്പായ, ചീര തുടങ്ങിയവ കൂടുതലായി ഉപയോഗിക്കുക. വാങ്ങുന്ന പച്ചക്കറികളെല്ലാം വേവിക്കുമ്പോൾ മഞ്ഞൾപ്പൊടി നിർബന്ധമായും ചേർക്കുക.

∙ചെറിയൊരു പുളിരസം അവയിലിന് അലങ്കാരമാണ്. കഷണങ്ങളെല്ലാം വെന്തു കഴിഞ്ഞാൽ മാങ്ങ അരിഞ്ഞതു ചേർക്കുകയോ പുളിയുള്ള അൽപം തൈര് ചേർക്കുകയോ ചെയ്താൽ പുളിരസം ഉണ്ടാകും. ചതച്ചെടുത്ത തേങ്ങ ചേർത്ത് വാങ്ങി വിളമ്പുന്നതിനു മുൻപ് അൽപ്പം വെളിച്ചെണ്ണ ചേർത്താൽ രുചി വർധിക്കും.

∙മധുരരസ പ്രധാനമാണ് പച്ചടി. പച്ചടിക്ക് ഉപയോഗിക്കുന്ന പൈനാപ്പിൾ കൈ കൊണ്ടു കൊത്തിയരിഞ്ഞു വേവിച്ച ശേഷം മിക്സിയിൽ അടിച്ചെടുത്ത് പാകം ചെയ്താൽ കൂടുതൽ രുചി കിട്ടും.

∙ കുമ്പളങ്ങയും വൻപയറും ചേർത്ത് തയാറാക്കുന്ന ഓലനിൽ തേങ്ങാപ്പാൽ ചേർത്താൽ രുചി വർധിക്കും. ഓരോ വിഭവവും രുചിച്ചതിനു ശേഷം വായ ഫ്രഷ് ആക്കാനുള്ള വിഭവമാണ് ഓലൻ‍.

∙പുളിയും ചെറിയൊരു മധുരവും ചേർന്നാൽ കാളനു ഗുണവും രുചിയും വർധിക്കും. പുളിരസം ഉണ്ടാകാൻ തൈരും നേരിയ മധുരത്തിന് നന്നായി പഴുത്ത നേന്ത്രപ്പഴവും ചേർത്ത് കാളനുണ്ടാക്കാം.

∙സാമ്പാർ പാകമായി അടുപ്പിൽ നിന്ന് ഇറക്കിയ ശേഷം ഉലുവപ്പൊടി വിതറി വറ്റൽമുളക്, കറിവേപ്പില, കടുക് എന്നിവ ചേർത്ത് വറുത്ത് താളിക്കുക. ഇതിന് ശേഷം പച്ച കറിവേപ്പില, മല്ലിയില അരിഞ്ഞത് എന്നിവ ചേർത്ത ശേഷം ഒരു ടീസ്പൂൺ വെളിച്ചെണ്ണ കൂടി ചേർത്ത് ഉപയോഗിക്കുക.