റീനു മാത്യൂസിനെ ആകർഷിച്ച ചൂടാക്കി കഴിക്കുന്ന ഗ്ലൂവൈൻ

എയർഹോസ്റ്റസായി ലോകം മുഴുവൻ സഞ്ചരിക്കുന്ന നടി റീനു മാത്യൂസ് ക്രിസ്മസ് ആഘോഷം കൊണ്ട്  തന്നെ ആകർഷിച്ച നഗരത്തിന്റെ കഥ പറയുന്നു.

ഓസ്ട്രിയയിലെ വിയന്നയിൽ റാത്തൗസിൽ തണുപ്പിലൂടെ നടന്നു കണ്ട ക്രിസ്മസ് കാഴ്ചയാണ് മനസ്സിൽ തങ്ങി നിൽക്കുന്നത്. തണുപ്പുകാലത്ത് ചൂടാക്കി നൽകുന്ന ഗ്ലൂവൈനുണ്ടവിടെ. അതൊരു രസികൻ അനുഭവമാണ്.ചൂടാക്കിയ വൈൻ ഞാൻ അതുവരെ കഴിച്ചിട്ടില്ലായിരുന്നു. എന്റെ കൂട്ടുകാരി എമിലിയാണ് റാത്തൗസിലെ ആഘോഷം കാണാൻ കൊണ്ടുപോയത്. റാത്തൗസ് എന്നാൽ ടൗൺഹാൾ. അവിടെ ക്രിസ്മസ് ആഘോഷങ്ങൾക്കു രണ്ടു നിറങ്ങളാണ്. രാവിലെ നമ്മൾ കണ്ട റാത്തൗസല്ല രാത്രിയിൽ. അത്രമാത്രം കളർഫുൾ. റാത്തൗസിലെ കടകളിൽ‍ കുക്കീസിരിക്കുന്നതു കണ്ടാൽ ജീവനുണ്ടെന്നു തോന്നും. കുക്കീസിന്റെ കണ്ണുകളിൽ ജാം നിറഞ്ഞു തുളുമ്പി നിൽക്കുന്നു. ചോക്ലേറ്റ് ഫൗണ്ടനിൽ നിന്നു പഴങ്ങളും കുക്കീസും മാഷ്മെല്ലോസുമുള്ള കപ്പുകൾ കിട്ടും. നിങ്ങൾക്കിഷ്ടമുള്ള ചോക്ലേറ്റ് ഇതിൽ നിറച്ചു കഴിക്കാം.