ഭക്ഷണം വീണ്ടും ചൂടാക്കി കഴിക്കാറുണ്ടോ? ഇത് നിങ്ങൾ അറിയാതെ പോകരുത്!

ഭക്ഷ്യ സുരക്ഷ എന്നത് തമാശയല്ല, വര്‍ഷം തോറും ലോകമെമ്പാടുമുള്ള 600 ദശലക്ഷത്തിലധികം ആളുകള്‍ക്ക് ഭക്ഷ്യവിഷബാധ ഉണ്ടാകുന്നു എന്നാണു കണക്ക്. പുറത്തു നിന്നു കഴിക്കുന്നവര്‍ക്ക് മിക്കവാറും പണി കിട്ടാറുണ്ട്. എന്നാല്‍, ശരിയായി തയാറാക്കുകയും സൂക്ഷിക്കുകയും ചെയ്തില്ലെങ്കില്‍ വീട്ടില്‍ ഉണ്ടാക്കുന്ന ഭക്ഷണവും പണി തന്നേക്കാം.

പാകം ചെയ്ത ഭക്ഷണം എത്രയും വേഗം കഴിക്കുക എന്നതാണ് ഒരു പ്രധാന കാര്യം. എന്നിരുന്നാലും, ഇത് എല്ലായ്പ്പോഴും പ്രായോഗികമല്ല. ഭക്ഷ്യസുരക്ഷ ഉറപ്പാക്കാന്‍ ഈയിടെ ലോകാരോഗ്യ സംഘടന പത്തു സുവര്‍ണ്ണ നിയമങ്ങള്‍ പുറത്തിറക്കി. 

സംസ്കരിച്ച ഭക്ഷണങ്ങള്‍

പഴങ്ങളും പച്ചക്കറികളും പോലുള്ളവ പച്ചയ്ക്ക് കഴിക്കാമെങ്കിലും, പല ഭക്ഷണസാധനങ്ങളും സംസ്കരിക്കാതെ സുരക്ഷിതമല്ല. ഉദാഹരണത്തിന്, അസംസ്കൃത പാലിന് പകരം, പാസ്ചറൈസ് ചെയ്ത പാല്‍ വാങ്ങുക. നിങ്ങൾക്ക് തിരഞ്ഞെടുക്കണമെങ്കിൽ, അയോണൈസിംഗ് റേഡിയേഷൻ ഉപയോഗിച്ച ഫ്രഷ് അല്ലെങ്കിൽ ഫ്രോസൺ കോഴി ഇറച്ചി വാങ്ങുക. ചീര പോലെ അസംസ്കൃതമായി കഴിക്കുന്നവ നന്നായി കഴുകേണ്ടതുണ്ട്.

നന്നായി വേവിക്കുക

കോഴി, മാംസം, മുട്ട, പാസ്ചറൈസ് ചെയ്യാത്ത പാൽ തുടങ്ങിയ പല അസംസ്‌കൃത ഭക്ഷണങ്ങളിലും രോഗകാരികളായ സൂക്ഷ്മജീവികള്‍ കാണും. വേവിക്കുമ്പോള്‍, ഇത്തരം ഭക്ഷണങ്ങളുടെ എല്ലാ ഭാഗവും ഒരുപോലെ, കുറഞ്ഞത് 70 ഡിഗ്രി സെൽഷ്യസിൽ എത്തണം. ശീതീകരിച്ച മാംസം, മത്സ്യം, കോഴി എന്നിവ പാചകം ചെയ്യുന്നതിനുമുമ്പ് തണുപ്പ് പൂര്‍ണമായും മാറണം.

പാകം ചെയ്ത ഭക്ഷണം ഉടന്‍ കഴിക്കുക

പാകം ചെയ്ത ഭക്ഷണങ്ങൾ തണുത്തു തുടങ്ങുമ്പോള്‍, സൂക്ഷ്മാണുക്കൾ പെരുകാൻ തുടങ്ങുന്നു. സമയം കൂടുന്തോറും അപകടസാധ്യതയും കൂടും. സുരക്ഷിതമായിരിക്കാൻ, വേവിച്ച ഭക്ഷണങ്ങൾ അധികം വയ്ക്കാതെ ഉടൻ തന്നെ കഴിക്കുക.

പാകം ചെയ്ത ഭക്ഷണം ശ്രദ്ധയോടെ സൂക്ഷിക്കുക

മുൻകൂട്ടി തയ്യാറാക്കിയ ഭക്ഷണം, നാലോ അഞ്ചോ മണിക്കൂറിൽ കൂടുതൽ സമയം സൂക്ഷിക്കണമെങ്കില്‍, 60 °C ന് മുകളിലോ 10 °C ന് താഴെയോ ഉള്ള താപനിലയില്‍ സൂക്ഷിക്കുക. ശിശുക്കൾക്കുള്ള ഭക്ഷണങ്ങൾ സൂക്ഷിക്കാൻ പാടില്ല. കൂടാതെ നല്ല ചൂടുള്ള ഭക്ഷണം റഫ്രിജറേറ്ററിൽ സൂക്ഷിക്കരുത്, ഇവ പെട്ടെന്ന് തണുക്കില്ല, 10 ഡിഗ്രി സെൽഷ്യസിനു മുകളിലുള്ള താപനിലയിൽ രോഗകാരികളായ സൂക്ഷ്മാണുക്കൾ തഴച്ചുവളരുന്നു.

പാകം ചെയ്ത ഭക്ഷണം ചൂടാക്കുക

പാകം ചെയ്ത ഭക്ഷണം ശരിയായി സൂക്ഷിക്കുമ്പോള്‍, സൂക്ഷ്മജീവികളുടെ വളർച്ചയെ മന്ദഗതിയിലാക്കുന്നു, പക്ഷേ അവയെ കൊല്ലുന്നില്ല. അതുകൊണ്ട്, ഒരിക്കല്‍ പാകം ചെയ്ത് തണുത്തു പോയ ഭക്ഷണം വീണ്ടും ചൂടാക്കി മാത്രം കഴിക്കുക. ചൂടാക്കുമ്പോള്‍ ഭക്ഷണത്തിൻ്റെ എല്ലാ ഭാഗങ്ങളും കുറഞ്ഞത് 70 ഡിഗ്രി സെൽഷ്യസിൽ എത്തണം.

പാകം ചെയ്ത ഭക്ഷണവും അസംസ്കൃത ഭക്ഷണവുമായുള്ള സമ്പര്‍ക്കം ഒഴിവാക്കുക

സുരക്ഷിതമായി പാകം ചെയ്ത ഭക്ഷണം അസംസ്കൃത ഭക്ഷണവുമായുള്ള ചെറിയ സമ്പർക്കത്തിലൂടെ പോലും മലിനമാകാം. ഇക്കാര്യം ശ്രദ്ധിക്കണം.

കൈകൾ നന്നായി കഴുകുക

ഭക്ഷണം തയാറാക്കാൻ തുടങ്ങുന്നതിന് മുമ്പും ശേഷവും കൈകൾ നന്നായി കഴുകുക. മത്സ്യം, മാംസം അല്ലെങ്കിൽ കോഴി തുടങ്ങിയ അസംസ്കൃത ഭക്ഷണങ്ങൾ തയ്യാറാക്കിയ ശേഷം, മറ്റ് ഭക്ഷണങ്ങൾ കൈകാര്യം ചെയ്യാൻ തുടങ്ങുന്നതിനുമുമ്പ് വീണ്ടും കഴുകുക. നിങ്ങളുടെ കയ്യിൽ അണുബാധയുണ്ടെങ്കിൽ, ഭക്ഷണം തയ്യാറാക്കുന്നതിന് മുമ്പ് അത് ബാൻഡേജ് ചെയ്യുക. നായ്ക്കൾ, പൂച്ചകൾ, പക്ഷികൾ തുടങ്ങിയ വളര്‍ത്തുമൃഗങ്ങളെ ഓമനിച്ചു കഴിഞ്ഞാലും കൈ നന്നായി കഴുകണം.

അടുക്കള വൃത്തിയായി സൂക്ഷിക്കുക

ഭക്ഷണങ്ങൾ വളരെ എളുപ്പത്തിൽ മലിനമാകും എന്നതിനാല്‍, അവ തയ്യാറാക്കാൻ ഉപയോഗിക്കുന്ന ഏത് ഉപരിതലവും തികച്ചും വൃത്തിയായി സൂക്ഷിക്കണം. വലിച്ചെറിയുന്ന ഭക്ഷണ അവശിഷ്ടങ്ങള്‍  രോഗാണുക്കളുടെ കലവറയായി മാറാം. അടുക്കളയില്‍ ഉപയോഗിക്കുന്ന പാത്രങ്ങളുമായും മറ്റും സമ്പർക്കം പുലർത്തുന്ന തുണികള്‍ ഇടയ്ക്കിടെ മാറ്റുകയും, വീണ്ടും ഉപയോഗിക്കുന്നതിന് മുമ്പ് തിളച്ച വെള്ളത്തില്‍ കഴുകുകയും വേണം.

അടച്ചു വയ്ക്കുക

പ്രാണികള്‍, എലികള്‍, പാറ്റകള്‍ മുതലായവ പലപ്പോഴും രോഗകാരികളായ സൂക്ഷ്മാണുക്കളെ വഹിക്കുന്നു. അതിനാല്‍ ഇവയെ ഒഴിവാക്കാന്‍ അടച്ച പാത്രങ്ങളിൽ ഭക്ഷണങ്ങൾ സൂക്ഷിക്കുക.

സുരക്ഷിതമായ വെള്ളം ഉപയോഗിക്കുക

കുടിവെള്ളം പോലെ തന്നെ പ്രധാനമാണ്, ഭക്ഷണം തയ്യാറാക്കുന്നതിനുപയോഗിക്കുന്ന വെള്ളവും. ജലത്തെക്കുറിച്ച്  എന്തെങ്കിലും സംശയമുണ്ടെങ്കിൽ, ഭക്ഷണത്തിൽ ഉപയോഗിക്കുന്നതിന് മുമ്പ് വെള്ളം തിളപ്പിക്കുക. കുഞ്ഞിന് ഭക്ഷണം തയ്യാറാക്കാൻ ഉപയോഗിക്കുന്ന വെള്ളം പ്രത്യേകം ശ്രദ്ധിക്കണം.